Shillong, Naitung 27
U Superitendent of Police (SP) ka East Khasi Hills, Bah Vivek Syiem ha ka sngi Nyngkong u la ïathuh, ba hynnin ka miet ha ka por kumba 10:30 mynmiet, la lap ïa uwei u briew, uba la shah dung da ka wait bad la shem ïa u hajan ka khyrdop jong ka BSF Battalion.
Ki shipai BSF ki la pynkit noh mar mar ïa u sha NEIGRIHMS, hospital ban ïoh jingsumar bad mynta u dang don hapdeng ka jingsumar.
U la ïathuh ba ha ka step, la ïoh jingtip ba la lap ïa kawei ka metïap ha Mawkasiang. U ne u briew u don bun tylli ki jingmynsaw na ka jingshah dungwait.
Shuh shuh u la ïathuh, ba ïa ka metïap la pynkit na ka bynta ban leh post-mortem, bad la register case halor kane ka jingjia bad ka jingtohkit ka la ïaid.
“Don sa uwei pat u briew na kajuh ka kynhun. Ïa une, la lap ha Mawtawar ha ka por mynmiet hapdeng ki jingmynsaw. Ïa u ruh la pynkit sha hospital. Kumta, ka paw ba kine ki lai ngut ki la ïadon lang,” u la ïathuh.
Ïa uba la ïap la ithuh kum u Shanbor Rani.
” Haduh mynta ngim pat lah ban ong kaei ka daw jong kane ka jingpynïap. Ngim pat tip la ka jingïap ka ïadei bad ka khaïi drok ne ka jingpynïap kput. Ynda ngi la pyndep ïa ka jingtohkit, ngin sa ïoh jingtip shaphang ka daw ba la pynïap ïa u Shanbor Rani. Ka kali kaba la pyndonkam, kadei jong uba la ïap,’ u la bynrap shuh shuh.
