Shillong, Naitung 27
Ka All India Khasi Jaiñtia Christian Fellowship (AIKJCF) kan pynlong ïa ka Annual Meet ne ka jingïakynduh ba shisien shisnem kaba Saw (4th Annual Meet) jong ka, ha Nongbah Kolkata, ka ba sdang naduh ka 01 tarik haduh ka 2 tarik u Nailar (August), 2026, ha kaba ka KJCF Kolkata, kan long ka nongpynïaid.
Kane ka dei ka sien kaba ar, ba ka KJCF Kolkata kan long ka nongpynïaid.
La seng ïa ka AIKJCF ha u snem 2021, ha ka por jong ka jingkhangdam COVID-19, da ki kynhun Khasi na kylleng ka ri India, da ka thong ban pynskhem ïa ka jingïatylli, jingïadei para bangeit bad jingïaseng lang hapdeng ki Khasi kiba shong basah ha ki Jylla bapher bapher jong ka ri India.
Haduh mynta, ka AIKJCF ka la pynlong lai tylli ki Annual Meet-kaba Nyngkong ha KJCF Kolkata (2023), kaba Ar ha KJCF Vellore (2024), bad kaba Lai ha KJCF New Delhi (2025). Mynta u snem, ka Annual Meet kaba saw kan long biang ha Kolkata.
Kane ka jingïaseng kan long ka por jong ka jingïakynduh lang ki khun Khasi-Jaiñtia na kylleng ka ri India hapoh ka shatri jong ka AIKJCF, ha kaba ki nongkren kin sa sam ïa ka ktien U Blei.
Ki nongkren ba kongsan kin long u Rev.Hamlet K. Rajee (President & Senior Pastor, Full Gospel Fellowship Church, Shillong) Rev. Dr. B. J. Syiemlieh (Former Principal, John Robert Theological College, Shillong).
Ka AIKJCF, lyngba kane ka jingpyntip, ka kyntu bad kyrpad ïa baroh ki para bangeit kiba shong ba sah ha ka Jylla Meghalaya bad ha kylleng ka ri India, ba kin kynmaw kyrpang ha ki jingduwai na ka bynta kane ka jingïakynduh lang kaba shisien shisnem.
