Shillong, Naitung 28
U Chief Electoral Officer (CEO) ka Jylla, u Dr. B.D.R. Tiwari ha ka Sngi Ba-ar u la ong ba ki don haduh 2,166 ngut ki nongthep ‘vote’ ha Meghalaya kiba la kyntait ban aiti ïa ki ‘Enumeration Form’ jong ki katkum ka ‘Special Intensive Revision’ (SIR), 2026.
U CEO ha kajuh ka por, u la maham ba kito ki bym lah ban pynpoi ïa ki phom jong ki hashuwa ka por ba la buh, kin ym paw ha ka ‘Draft Electoral Roll’ ka ban sa pynmih ha ka 5 tarik Nailar.
Namarba ka sah sa tang shisngi ban pyndep ïa ka jingsam bad ka jingpynrung kyrteng lyngba ki lad ‘digital’, u Dr. Tiwari u la ong ba la bthah ïa baroh ki ‘Booth Level Officer’ (BLO) ban kynthup mardor ïa ki longïing kiba dang sah.
Katkum ka jingpynshisha ba la pynmih ha ka 28 tarik u Naitung, 1,49,656 ngut ki nongthep ‘vote’, lane 6.37% na ki 23,49,645 ngut ki nongthep ‘vote’ ka Jylla, ki la ngat hapoh ki thup kyrdan ‘Absent’, ‘Shif-ted’, ‘Death’ bad ‘Dup-licate’ (ASSD).
Kane ka kynthup ïa 74,851 ngut kiba la ïap, 37,914 ngut kiba la kynriah jaka, 28,826 ngut ki bym don ne pep, 5,899 ngut ki ‘Duplicate’, bad 2,166 ngut kiba la kyntait ïa kane.
Nalorkata, 2,24,435 ngut ki nongthep ‘vote’, lane 9.55% na ki nongthep ‘vote’, ki hap ha ka kyrdan ‘No Mapping’ bad ki dang donkam ban pynshisha shuh-shuh.
“La kyntu ïa ki nongthep ‘vote’ ki bym pat aiti ïa ki phom ba la pyndap bha ba kin leh mardor ïa kane da kaba aiti noh ïa ki sha ki BLO jong ki lane lyngba ka ‘Self-Enumeration’ ha ka ‘ECINET App’ ne ‘Portal’,” ong u CEO.
U Dr. Tiwari u la pynshai ba baroh ki ASSD bad kito kiba kyntait yn sa shimkhia ha ryngkat ki jingpyrkhing katkum ka ‘Registration of Electors Rules, 1960’, hadien ba la pynshisha bha bad hadien ba la ailad ïa ki nongthep ‘vote’ ba dei hok ne ki bahaïing hasem jong ki.
Shuh shuh naba ka SIR ka la poi sha ka bynta kaba khatduh, u CEO u la kyrpad ïa baroh ki nongthep ‘vote’ kiba dang sah ban ïashim bynta khnang ban pyntikna ïa ka ‘Electoral Roll’ kaba khuid, kaba tikna bad kaba kynthup lang ïa baroh.
Ka bynta jong ka SIR-2026 ba ïadei bad ka jingleit rung sha man la ki thliew ïing kan kut ha ka 29 tarik u Naitung.
