Shillong, Naitung 28
Ka Special Intensive Revision (SIR), 2026 jong ka Jylla kan pynkut noh ïa ka jingïaid lynti jong ka sha man la ki thliew ïing ha ka 29 tarik u Naitung.
Kumba ka long, la ïathuh ba ka Jylla ka la jan dep lut ïa baroh ki kam haba ïadei bad kane ka bynta bad ym shym la don kano-kano ruh ka jingujor haduh mynta.
Ïa kane la ïathuh da u Chief Electoral Officer (CEO) ka Jylla, u Dr. B.D.R. Tiwari ha ka Sngi Ba-ar.
Haba kren sha ki lad pathai khubor, u Dr. Tiwari u la ong ba kane ka kam ka la sakhi ïa ka jingsam (EF) kaba 99.62% bad 96.95% ka jingpynrung kyrteng ‘Enumeration Form’ lyngba ki lad ‘digital’ haduh ka 28 tarik Naitung.
Na ki nongthep ‘vote’ baroh, kata na ki 23,49,645 ngut, baroh ki phom kiba la dep sam ki long 23,40,764 tylli katba 22,78,071 tylli kiwei pat ki dei kiba la pynrung kyrteng lyngba ki lad ‘digital’.
“Namarba ka sah sa tang shisngi, la bthah ïa ki BLO ban kynthup ïa ki longïing kiba dang sah bad ban pyndep ïa ka jingpynrung kyrteng lyngba ki lad ‘digital’ hapoh ka por ba la buh. Haduh mynta, ngim pat ïoh kano-kano ka jingujor bad kino-kino ki jingeh kiba mih, ngi la dep pyrshang ban pynbeit ïa ki,” ong u Dr. Tiwari.
U la ong ba ki jingïalang khmih bniah ba man ka taïew bad ki jingïalang ‘video conference’ bad ki DEO, ERO bad AERO ki la ïarap ban pynbeit kloi ïa ki jingeh ha ka kyrdan jong ki shnong ki thaw bad ban pynlong ïa ka rukom treikam kaba ïaid beit ïaid ryntih katkum ki kyndon jong ka Election Commission of India.
Haba phai sha ka jingpynthymmai ha ka jingpynïaid kam, ka ECI ka la mynjur ban pynbeit ryntih ïa ki jaka thep ‘vote’ ha Meghalaya.
Kane ka sienjam kan kynthup shuh sa 86 tylli ki jaka thep ‘vote’ bathymmai, ha kawei ka liang ka ban kyntiew ïa ka jingdon jong ki jaka thep ‘vote’ ha baroh kawei ha ka Jylla, kata na ka 3,551 sha ka 3,637 tylli.
Kane ka jingpynbeit thymmai ka thmu ban pynbha ïa ka jinglah ban ïoh bynta jong ki nongthep ‘vote’ bad ban pynduna ïa ka jingkhapngiah ha ka sngi thep ‘vote’.
U Dr. Tiwari u la pynlong ruh ïa ka jingïalang bad ki nongmihkhmat na ki Seng Saiñ pyrthei ba la ithuh ban khmih bniah ïa ka jingïaid shakhmat bad ki kam kiba dang sahteng hashuwa ban pynmih ïa ka ‘Draft Electoral Roll’.
Ha kane ka jingïalang, u CEO u la ïasam ruh ïa ki jingtip thymmai halor ka jingsam ïa ki phom, ka lad pynïasoh ‘digital’, bad ka jingpynshisha ïa ki ASSD.
Ha kajuh ka por, u la kyntu ïa ki seng saiñ pyrthei ban bteng ka jingïatreilang khnang ban pyntikna ba kane ka kam kan kynjoh 100% hashuwa ba kan kut ha ka 29 tarik u Naitung.
Shuh shuh u la ïaroh ïa ki jingai jingmut kiba tei na ki seng, kumjuh ïa ka bynta jong palat 1600 ngut ki ‘Booth Level Agent’ kiba la thung da ki seng saiñ pyrthei ban synran lang ïa ki nongthep ‘vote’ bad ban pyntikna ïa ka jinglong khuid haba ïadei bad kane ka liang.
“Ka jingïatreilang kaba ïai bteng hapdeng ki tnad treikam ilekshon bad ki seng saiñ pyrthei ka la ïarap shi kat dei ïa ka jingjop ha ka jingpyntreikam hok ïa ka SIR ha kylleng ka Jylla”, la ong u Dr. Tiwari.
Na ka liang u Dr. Tiwari, u la ai khublei ïa ka ECI, DEO, ERO, AERO, BLO, BLA, ‘Technical Team’, ki seng saiñ pyrthei, Dorbar Shnong, Nokma, ki lad pathai khubor bad ki kynhun seng ha ka imlang-sahlang halor ka jingkyrshan ban pynlong ïa kane ka jingleit rung ïing briew kaba jop.
