Khliehriat, Naitung 28
Ka Khasi Students’ Union (KSU) East Jaiñtia Hills District Unit ka la kyntu ïa ki bor pynïaid district bad pulit ba kin pynthikna ïa ka jingpahara kaba khlaiñ na ka bynta ka jingpynlong ïa ka jingpynsngew paidbah ne ‘Public Hearing’ halor ka jingthmu tih mawshun ha Lum Syrman, Elaka Nongkhlieh kaba la buh ban pynlong ha ka 31 tarik Naitung.
Ha ka shithi sha u Deputy Commissioner bad Superintendent of Police ka District, ka KSU ka la kynnoh ba ki nongïashim bynta kiba la wan sha ka public hearing kaba la dep ki la shah khanglad lyngba ka jingkhang ïa ki lynti ïaid bad ka jingshah kawang maw katba ki dang pyrshang ban leit ïashim bynta sha katei ka jingïalang ban pynpaw ka jingpyrshah ïa kane ka projek tih mawshun.
“Ha ka public hearing kaba la dep la sakhi ïa ki jingjia shah khang lynti bad ka jingshah kawang maw kaba buh jingma ym tang ïa kito kiba leit ïashim bynta hynrei kaba la pynthut ruh ïa ka jingthmu ha kaba pynlong ïa kane ka jingpynsngew paidbah.
Ym dei ban don ka jingkhanglad ïa kino-kino ki briew shimet ba kin pynpaw ïa ki jingsngew jong ki, kata la ki kyrshan ne ki pyrshah ïa ka projek,” ong u General Secretary ka KSU u samla Kwilnis S Suchiang.
Ka KSU ka la kyntu ïa ki bor synshar ba kin pynbiang lypa ïa ki bor pulit bad ki magistrate hashwa ban pynlong ïa kane ka hearing khnang ban khanglad na ka jingkhang ïa ki lynti surok bad ki lynti ïaid, ka jingkawang maw, ki jingpyntieng pynsmiej bad kiwei pat jingpynkheiñ ïa ka suk ka saiñ. Ka khot ruh ba baroh ki surok kiba lam sha ka jaka pynlong jingïalang kin plie laitluid bad ki dei ban long kiba shngaiñ na ka bynta baroh ki nongwan ïashim bynta.
Ka seng ka la kyntu ruh ban buh ïa u nodal officer, la u dei magistrate ne heh pulit ïa uba dei ban ïasam lypa ïa u nombor phone uba lah ban ïakren bad ki nongïashim bynta khnang ban lah ban tuklar mardor lada mih kino-kino ki jingjia.
Ka seng ka la khot ruh ban pynngat mardor ha ki kyndon aiñ pyrshah ïa kito kiba donkti ha kino-kino ki jingpakhang lynti, kiba pynjulor ïa ki jingtei jong ki paidbah ne kiba pynmih jingïakynad, da kaba kyntu ïa ki bor ba dei khmih ban pynngat ïa ki ha ki kam bymman hapoh ki kyndon jong ka Bharatiya Nyaya Sanhita (BNS) lem bad kiwei pat ki kyndon.
“Ngim kwah ïa kano-kano ka jingïaleh markylliang, hynrei ngi khmih lynti ïa ki bor pynïaid district bad ki pulit ba kin pynthikna ban pynneh ïa ka jingsynshar jong ka aiñ khlem ka jingtieng bad ka jingshah liang. Lada ki dang mih biang ki jingïakynad bad ki jingpynthut, kito kiba donkti ki dei ban shah pynngat ha ki kyndon aiñ,” ong u nongïalam ka seng.
