Shillong, Naitung 28
Hadien ka jingïoh pdiang ka khubor na ki nongdie madan kiba ju shong ha Jail Road, ba ki la shah kyndang jubor ha ki ophisar ka tnad Municipal Board, na ka liang ka Voice of the People Party (VPP) State Youth Wing, mar-mar ki la leit sha katei ka jaka ban ïakren bad ki ophisar.
Ha ka por ba la poi ki nongïalam ka VPP SYW, ka la mih ka jingïania kaba jur bha bad ki ophisar ka SMB, ha kaba ka VPP ka la pan da kata ka hukum ban wan kyndang jubor ïa kiba die madan, hynrei ki ophisar kim shym la ai satia ïa kata ka hukum.
Kane ka jingpyrshah ka VPP YW, ban kyndang jubor ïa kiba shongdie jingdie ha Jail Road, kadei hadien ba ki la dep ban ïakynduh bad u CEO ka Municipal, kaba ki la kyrpad ban ai por ïa kiba shongdie madan ha Jail Road shuwa ban kyndang ïa ki, hynrei mynta ka sngi ki la shah kyndang kynsan.
Ka jingleit kyndang jubor ki ophisar ka Municipal Board ïa kiba die madan, ka paw ba ka jingkyrpad ka VPP na u CEO, ban ai por kam shym la urlong satia.
Kumta ka VPP ka pynpaw ka jingpyrshah halor kane ka jingleh ka Municipal Board.
Haba kren sha ki lad pathai khubor u Samla Nathaniel Mawrie, Secretary VPP YW u la ther tyngeh ïa ka Sorkar, da kaba ong, “Kane ka jingleh ka Sorkar ban kyndang jubor ïa ki paradoh parasnam, kadei ba ka kwah ba kin duh kamai, katba ïa ki briew ba nabar pat ki ai jaka, ban wan kamai sha ka Jylla”.
“Mynshuwa ngi la dep ban wan jurip hi da la ki jong ki khmat, ba ka jaka ba die jingdie ha Jail Road ka pynkhapngiah ne em ïa ki paidbah ba ïaid ba ïeng. Ha ka jingjurip ngi la lap ba kane ka jaka ka long kaba kylluid bad kam shym la pynthud ïa ka ïaid ka ïeng ki paidbah. Ha u CEO ngi la dep ban kyrpad ban ai por shuwa ban kyndang, hynrei mynta ka sngi pat ki ophisar ka SMB ki la wan ban kyndang naphang,” u la ong.
U la buh jingkylli ruh ïa u CEO ka SMB, ba kumno u kylla ktien ban phah ïa ki ophisar ban kyndang noh ïa kiba shongdie madan ha Jail Road. Kane ka paw ruh ba u CEO um shym la burom ïa ka jingleit ïakynduh ka VPP ryngkat ki nongdie madan.
“Kane ka paw shai ba ka Sorkar kam shym la kheiñ snep ïa ki rit ki ria bad ki leh beit ïa kaei kaba ki mon ma ki bad ban kyndang da ka bor. Kane ka jingleh ka Municipal kadei beit ban pynksan ba ka Sorkar kadei kaba ju leh donbor beit, ha kaba ïa ki rit ki ria kam salia,” la ong u Samla Nathaniel.
“Ngi ïohi ba ki heh saipan kiba wan sengkam ha ka Jylla, ka Sorkar ka pynbiang lut nadong shadong, wat ba hap ban pynjot ïa ka mariang ruh, hynrei na bynta ban kyntiew ka ïoh ka kot jong ki paradoh parasnam pat ka Sorkar kam don ka jingïarap,” la bynrap u Samla Nathaniel, da kaba ong ruh “Ka kham kordor ban im kiwei, bad ban ïap ki lajong”.
