Shillong, Naitung 28
Ka la mih ka jingkynnoh na kawei ka longkmie kaba la kam ba kadei kaba die jingdie harud surok ka Jail Road, ba uwei u bar jylla u la pynbam pisa ïa ka haduh 10 hajar tyngka, tang ban ïoh shong ha ka dukan jong ka.
Haba ïadei bad kane, ka longkmie ka la pyntip mar-mar sha ki nongïalam ka VPP State Youth Wing, ban tuklar halor kane ka kam.
Ha ka jingpoi ka VPP ha katei ka dukan, ka la mih ka jingïakren, ha kaba katei ka longkmie ka la pynpaw ba ïa ka dukan kadei ban long trai ma ka, katba u bar jylla u la shna syndon da ka dukan dihsha bad kumjuh ruh ban pynbieit ïa ka, da kaba pynbam da ka pisa.
Kane ka longkmie hakhmat jong ka VPP, ka la sei ïa ka pisa ban pynphai noh sha une u bar jylla, da kaba ong “Ngam dei ka nongdie ri, ban shim ka pisa na ki bar Jylla”.
Ka la mih ka jingïatai nia kaba jur bha, ha kaba na ka liang u bar jylla ruh u la pynksan da kaba sei ïa ki kot ki sla kiba u la ïoh pdiang na ka SMB, katba katei ka longkmie ka la sei lang kumjuh ïa ki kot ki sla, kiba ka la ïohpdiang na ka ophis Municipal.
Katkum ka jingïathuh katei ka longkmie, ka ong ba kam shym la don ha ka por ba wan jurip ka tnad Municipal namar ba ka dangrit khyllung, da kaba pynthikna ba mynshuwa katei ka jaka, dei ka jaka ba ka ju shong ban die jingdie, hynrei ka la ong ba mynta hadien ba ka wan la ïoh shong pynban da u bar jylla.
