Shillong, Naitung 29
Ka Meghalaya Rural Tourism Forum (MRTF) ha ka Sngi Balang ki la phah da ka jingthoh sha u Myntri ka tnad jngohkai pyrthei ka Jylla u Timothy D. Shira ban kyrpad ba ka Sorkar kan shim noh da ki sienjam kiba kyrkieh ban tehlakam ïa ki nongwan jngohkai ban shet jingshet ha ki rud surok bad ki jaka paidbah.
Haba kren sha ki nongthoh khubor u Bah Alan West Kharkongor President ka MRTF u la ong ba kane ka jingleh ki nongwan jngohkai pyrthei ha ka Jylla ka pynjaboh ïa ki rud surok bad kane kan ktah ruh ïa ki jingitynnad ki jaka jngohkai bad kan ktah ruh ïa ka Mei Mariang lada ka Sorkar kam lah ban lei eiei.
Namar kata ka kynhun ka la dawa ïa ka Sorkar ban khang ïa ki nongwan jngohkai pyrthei ba kin shet ha ki rud surok lane ha kino-kino ki jaka khnang ba kan long ka jingpynneh pynsah ïa ka jingitynnad, ka jingkhuid ki jaka jngohkai kiba don ha ka Jylla.
Ka Forum ka la kyrpad ruh ba ïa kane ka hukum dei ban pynbna paidbah lyngba ki kot khubor, ki website bad ki rynsan paidbah (Social Media) jong ka tnad jngohkai pyrthei bad ban pyni paidbah ha ki Hotel, ki Homestay, Resort bad ha ki jaka jngohkai.
Ka MRTF ka la ai jingmut ruh ba dei ban buh da ki jingthoh ha ki jaka rung sha Meghalaya kum ha Byrnihat, Nongpoh bad ha ki jaka jngohkai paidbah ban pyntip ïa ki nongwan jngohkai ba kim dei ban shet ha ki rud surok lane ha kino-kino ki jaka.
Ka Forum ka kyrpad ruh ïa ki paidbah, ki seng shnong bad ki kynhun kiba trei ha ka kam jngohkai ba kin ïarap ban pynsngewthuh ïa ki nongwan jngohkai ban bud ïa ki kyndon.
Shuh-shuh ka Forum ka la kyrpad ïa ka Sorkar ban pynbha ïa ka rukom lum bad jaka bret ñiut ha baroh ki jaka jngohkai ha Meghalaya, ka Forum ka ngeit ba kine ki sienjam kin ïada ïa ka Mariang bad kyntiew ïa ka kam jngohkai kaba don ka jingkitkhlieh ha Meghalaya.
