Shillong, Naitung 29
Ki pulit ka thanad Sadar kila pynngat ha ki ar tylli ki kyndon ka aiñ Bharatiya Nyaya Sanhita (BNS) pyrshah ïa u nongïasaid aiñ uba shah kynnoh jrong kti khlem akor ïa kawei ka samla pule Law ba wan leh ‘intern’ bad u.
Ki pulit kila register case pyrshah ïa une u nongïasaid aiñ hapoh ka thanad Sadar Case No. 265/2026 bad pynngat hapoh ka kyndon 74 bad 75 jong ka Bharatiya Nyaya Sanhita (BNS).
Ïa kane ka case la register halor ka ejahar ba la mudui da kane ka samla ha ka sngi Ba-ar, kaba la kynnoh ba kane ka jingjia kala jia katba ka dang leit leh ‘intern’ hapoh ka jaka treikam une u nongïasaid aiñ kaba don marjan ka Goenka Engineering Works.
La kynnoh ruh ba une u nongïasaid aiñ u la pyrshang ban tyrwa ïa ka da ka pisa bad kyrpad ba kan wan ïakynduh biang ïa u ha ka sngi Saitjaiñ. Kane ka samla, kala pyntip ïa la ki paralok parajor hashuwa ba kan leit sha ki pulit ban buh ïa ka jingujor.
U Superintendent of Police (City) Bah Dangsan Khyriem u la ong ba ïa kane ka jingujor la mudui ha ka 28 tarik Naitung bad ïa ka case la register hapoh ka Bharatiya Nyaya Sanhita. U SP City u pyntip ba ka jingtohkit kala sdang ban pynthikna ïa kaei kaba jia bad ban leh ïa kaba donkam katkum ka aiñ.
