Tura, Naitung 29
U Myntri Rangbah ka Jylla Conrad K Sangma ha ka sngi Balang, u la sam ïa ki skhim kiba hap hapoh ka Chief Minister’s Special Development Fund (CM-SDF) ha ka jingïalang kaba la pynlong hapoh ka ïingsah jong u ha Tura, West Garo Hills.
Haba ai jingkren ha ka jingïalang, u Myntri Rangbah u la pyntip ba ka CM-SDF, ka dei ka skhim ka la bei na ka mang tyngka ba la bhah sha ka Chief Minister’s Secretariat. U pyntip ba ïa kane ka song pisa la pynmih khamtam ban kyrshan ïa ki skhim kiba rit bad kiba ïarap bha na ka bynta ki paidbah ha kylleng ki thaiñ.
U Myntri Rangbah u la pynpaw ruh ba ka Sorkar Meghalaya kala pyntreikam ïa bun jait ki skhim pynroi ha kylleng ki Constituency jong ka Jylla. “Katba ka jingkhmih lynti ka lah ban nym ïahap bad ka jingsam, ngi dang pyrshang pat ban pynpoi sha man ki thaiñ- ym tang ha Ri-lum Garo hynrei ha Ri-lum Khasi bad Jaiñtia ruh,” u la ong.
U la bynrap ba nalor ka CM-SDF, ki don ki skhim ba ïoh na ki tnad bapher-bapher, hynrei, ka Sorkar kala pynlong kongsan ïa ka CM-SDF ban pynthikna ba ki jingmyntoi kin poi beit-beit sha u paidbah.
Haba jubab ïa ki jingkylli halor ka jingslem ban pynlait ïa ka pisa ka CM-SDF, u Myntri Rangbah u la batai ba namar ka jingbun ki jingdawa, ka Sorkar kala pynbeit ban pynthikna ïa ka jingsam ba mar katjuh ha baroh ki thaiñ ka ban long hapoh ka mang tyngka kaba don. U la pynshai ruh ba ka jingpynlait ïa ka pisa ka long hadien ka jingbud ïa ki kyndon lyngba ka ophis ki Deputy Commissioner.
Ka jingthmu jong ka prokram ka long ban pyntip sha ki paidbah halor ki thaiñ bad ki jaka kaba la mang ïa ki skhim.
U Myntri Rangbah u la ai khublei ïa ki nongtrei ka Chief Minister’s Secretariat kiba la trei shitom ban lah pynlong ïa kane ka prokram kaba jop haba sngewnguh ruh ïa ki paidbah ïa ka jingkyrshan ba kila ai.
