Shillong, Naitung 29
U Symbud Myntri Rangbah ka Jylla, Bah Prestone Tynsong ha ka Sngi Balang u la ong ba ka Sorkar Meghalaya ka la tyrwa ba ka Sorkar Pdeng kan thied ïa baroh ki jaka kiba don hapoh 150 ‘yard’ jong ka khappud ka India-Bangladesh ban pynsted ïa ka jingker sainar bad ban ïada ïa ki nongshong shnong khappud.
Haba kren sha ki lad pathai khubor, u Bah Prestone uba bat ïa ka tnad kam pohïing u la kdew ïa ki shnong kiba don ha ki jaka kum ka Pynursla kiba jngai tang 50-60 mitar na ki païa khappud. Hapoh ki kyndon kiba la don lypa, dei ban pynïeng ïa ka jingker sainar 150 ‘yard’ hapoh ka jaka jong ka India.
“Lada ngi bud ryntih ïa ka kyndon 150 ‘yard’, ki shnong baroh kin hap shabar jong ka jingker sainar. Kata ka pynkylla ïa ki sha ka ‘No Man’s Land’,” ong u Bah Prestone.
“Ngim pyrshah ïa ka jingker sainar. Ngi donkam ïa ka. Hynrei ngim lah ban shu iehnoh kumto ïa ki briew jong ngi khlem jingïada,” u la ong.
Ban weng ïa kane ka jingeh, ka Jylla ka la thoh sha ka tnad kam pohïing ka Sorkar Pdeng bad ka la pynlong ruh ïa ki jingïakren bad ki shipai BSF bad ka NBCC, u la bynrap.
U Bah Prestone u la ong ba na ka liang ka Meghalaya ka la ai jingmut da kawei pat ka lad.
“Lada ym lah ban pynjynsur ïa ka 150 ‘yard’, te ka Sorkar India ka dei ban thied beit ïa kata ka lynter jaka khnang ba yn pynkynriah ïa ki nongshong shnong bad ki nongrep sha ki jaka ba shngaiñ,” u la ong.
Ïa kane ka jingtyrwa, u la kdew, kan pynïabiang tara ïa ki jingdonkam jong ka jingïada ka ri bad ka lad kamai bad jingshngaiñ jong ki briew kiba sah ha lynter khappud.
