Shillong, Naitung 29
U Symbud Myntri Rangbah ka Jylla, Bah Prestone Tynsong ha ka Sngi Balang u la ong ba ka Meghalaya kam lah ban shim ïa ka jingkitkhlieh halor ka jingshlei um ha Assam, da kaba kynthoh ba ka jingeh ka mih na ka jinglong-jingman ka jaka bad ka jingduna jong ki jingtei ha ki jaka ba long them.
Haba jubab ïa ki jingkynnoh kiba man ka por, u Bah Tynsong u la ong ba ki jaka lum jong ka Jylla kim dei ka daw jong ka jingshlei um sha ki bynta ba sharum.
“Phi donkam ban leit peit hi dalade. Ki jingshlei um kim ju jia ha ki jaka lum. Ki jia ha ki jaka ba long them,” ong u Bah Prestone haba kren sha ki nongthoh khubor.
U la kdew ruh ïa ka jingbym biang ka nala pyntuid um bad ka jingsaiñdur kum ki daw ba kongsan jong ka jinglang ka um ha ki jaka ba long them, bad ong ba ym lah satia ban batai (lypa) ïa ka rukom hap u slap.
“Haba phi don ha ka jaka ba long them, lada ym shym la shna bha ïa ki nala pyntuid um bad ki jingtei, te kane kan jia beit. Bad ym don ba lah ban ong tikna lano ngin ïoh u slap uba jur ne uba duna. Ka long ka bym lah ïa ki briew ban batai lypa ïa kine baroh,” u la ong.
U Symbud Myntri Rangbah u la ong ba ban kynnoh ïa ka Meghalaya man ka por ba jia ka jingshlei um ka long ka bym ïahap, bad ban jur ba baroh ar tylli ki Jylla ki don la ka jong ka jingkitkhlieh kaba ïasam lang.
“Kane ka jingkynnoh ïa ka Meghalaya ka mih biang na ka por sha ka por tang namarba ngi don ha ka jaka kaba kham hajrong bad ka Assam ka don kham hapoh. Ngim lah ban pynkylla ïa ka jinglong-jingman ka jaka. Phim lah ban kynnoh beit ïa ka Meghalaya, kumba ka Meghalaya kam lah ban kynnoh ïa ka Assam. Ha kaba kut, ngi baroh ar ngi don ka jingkitkhlieh lang,” u la ong.
U Bah Prestone u la bynrap ba ïa ki ‘Consultant’ ba la thung da ka Sorkar Jylla bad ka Sorkar Pdeng la dep ban ïathuh lypa ban pynrung ne kynthup lang ïa ki rukom pyntuid um bad ki ‘Culvert’ kiba biang ha baroh ki projek thymmai.
“Ki ‘Consultant’ kiba dei khmih, la ki dei jong ka Jylla ne ka Sorkar Pdeng, ki don ïa kane ka bynta ba la bsut ha ki. Hap ban leh bha ïa ka jingpyntuid um. Ki ‘Culvert’ ki hap ban don ha ka jaka jong ki. Ïa kine ki mat la dep ban shimkhia ha ki projek ki ban sa wan,” u la ong.
U la kdew ruh ïa ka surok ‘Ring Road 6-lane’ ka ban sa wan ha Assam kum ka nuksa jong ki jingtei ki ban ai jingmyntoi ïa baroh ar tylli ki Jylla.
“Ka Assam kan sa ïoh ïa ka surok ‘Ring Road 6-lane’. Kata kan ai jingmyntoi ruh ïa ka Meghalaya. Na Sonapur ngin pynïasoh ïa ka sha Meghalaya sha Silchar kum ka ‘Speed Corridor’. Na Sonapur kan pynïasoh sha ka liang ka Ri-Bhoi bad ha kaba kut kan ïakynduh hajan Umïam,” la ong u Bah Prestone.
