Shillong, Naitung 29
Ki longkmie kiba shongdie madan ha Jail Road ki la pyneh beit triang ban ym kynriah na ki jaka ba ki shong die jingdie wat haba ki briew ka ophis Shillong Municipal Board (SMB) ki la wan ban phah weng ïa ki jingdie jong ki ha lynti ïaid kjat ha Jail Road ban kynriah sha Polo Towers.
Haba pynpaw markhmat ïa ki ophisar jong ka SMB ki longkmie ba shongdie madan ki la pynpaw ba kin nym kynriah da lei-lei lada ka Sorkar kam lah ban pynbiang ki jaka ba kin shong die jingdie kumjuh ki la dawa ruh ba ka Sorkar ka dei ban ai jaka ïa ki ha ka jaka ba biang ka ïew bad ka jingïadei ïathied.
Da ka jingsngewkhia kaba jur ki la pynpaw ba lada ka Sorkar kam shah shuh ïa ki ban shong die jingdie ha kitei ki jaka ba ki ju shong die jingdie mynta la bun-bun snem, kan ktah jur ïa ka jingkamai jong ki bad kim sngew don jaka shuh ban kamai da kiwei ki kam bad pynpaw ruh ba kumno kin kyrshan skul bad ba kin lah ban pyndap ïa ki jingdonkam ha ki ïing ki sem jong ki.
Ki la kynnoh ba ka jingphah weng ka Sorkar ïa ki mar na ki jaka ba ki ju shong ban die jingdie ka dei ka jingleh donbor bad pynpaw ba lada kim ïoh shuh ban die jingdie ki khun ki kti ki jong ki kin sa ïap thngan bad kin duh ban bteng ïa ki jingpule ki jong ki.
Namar kata kine longkmie ki la kyntu ruh ïa ki ophisar ka SMB ba kin rah ïa ka khubor sha ka Sorkar ba kan ïarap bad ban sngap ïa ka jingeh kumjuh ki jingdawa jong ki khnang ba kan ym don kano-kano ka jingeh ha ki por ban wan.
