Shillong, Naitung 30
Ka Hynñiewtrep Integrated Territorial Organization (HITO), ha ka 30 tarik u Naitung, 2026, ka la phah da ka dorkhas sha u Myntri ba dei khmih ïa ka tnad pynmih bording ka Sorkar Jylla, u Bah Metbah Lyngdoh, da kaba dawa ban pynsangeh shuwa ïa ka jingtyrwa lilam ïa ki tiar jot (scrap material) jong ka Meghalaya Power Distribution Corporation Limited (MEPDCL) lyngba ka ‘online auction’ bad ban pynlong da ka ‘offline auction’.
Haba kren sha ki lad pathai khubor, u Bah Donbok, President u la ong ba ka jinglilam ïa ki tiar jot lyngba ka ‘online platform’ jong ka Metal Scrap Trade Corporation (MSTC), kan plie lad ïa ki nongkhaïi na shabar ka Jylla kiba don ka bor pisa bad kan pynduh lad ïa ki trai Jylla ban ïoh bynta ha kane ka ‘auction’.
U la ong ruh ba ka ‘offline auction’, kan plie lad ïa ka jingïakob kaba kham ïaryngkat bad kan ïarap ba ki trai ri trai muluk kiba shaniah ha kum kine ki lad kamai bad kdew ruh ïa ka Clause A (3) jong ka tender notice, kaba dawa ïa ki nongshim bynta, kiba ym dei ki riewlum ban pyni ïa ka Trading License ba la ai da ki Autonomous District Council.
Hynrei, ka HITO ka ong, ba watla don katei ka kyndon, hynrei ka dang ai lad ïa ki nongkhaïi na shabar ban ïoh bynta ha ka ‘auction’, kaba lah ban ktah ïa ki trai jylla.
U Bah Donbok u la kdew ruh ba ka HITO haduh mynta kam pat lap ïa kano-kano ka hukum ka Sorkar, jingpyntip, ne polisi na ka Sorkar India ne ka Sorkar Meghalaya, kaba kdew ba ka MEPDCL kadei ban pyndonkam tang ïa ka MSTC ban lilam ïa ki tiar jot.
“Ngi buh san tylli ki jingdawa, ba kynthup ïa ka jingpynsangeh shuwa ïa ka ‘online auction’ bad pynlong da ka ‘offline auction’, ban bishar thymmai ïa ki kyndon shim bynta, ban pynshai halor ka jingïadei bad ka MSTC bad ban pynmih paidbah ïa kino-kino ki hukum ka sorkar, kiba ïadei bad kane ka bynta,” u la ong.
