Shillong, Naitung 30
Ka Education Cell jong ka Hynñiewtrep Youths’ Council (HYC) ha ka sngi Palei ka la leit ban buh jingthoh ha u Acting Vice Chancellor jong ka North Eastern Hill University (NEHU) u Prof. Saroj Kanta Barik ban kyntu ïa u ba u dei ban aiti noh ïa ka shuki Vice Chancellor sha u Prof. Romendro Khongsdier.
Ha ka shithi ka HYC ka la pynpaw ka jingsngewkhia ha ba ïadei ka jingpdiang u Prof. Barik ban long kum u Vice-Chancellor ban khmih ban peit ïa ka skulbah NEHU haba dang don u Prof. R. Khongsdier u ba kham slem ka jingai jingshakri hapoh ka skulbah.
Haba kren sha ki nongthoh khubor u Bah Enlang Sawian u la ong ba u Prof. Barik kum u Professor ba la shakri bun snem ïa ka NEHU u tip bha ïa ki kyndon jong ka NEHU bad ka jingpdiang jong u ïa kane ka kam VC, ka la pynlong ban buh jingkylli ïa kiba bun.
U Bah Enlang u la ong ba ka jingthung ïa u Prof. Barik ka long kaba be-aiñ kaba khlem da bud ïa ki kyndon bad ki aiñ ka NEHU. “Katkum ka shithi thungkam, la paw ba u dei u Professor barit ha NEHU bad kane ka pyni ba dang don ki Professor kiba kham rangbah ban ïa u” u la ong.
Shuh-shuh u la ong ba kane ka skulbah ka don ïa ki Professor ba la kham rangbah bad u ta u dei u Prof. Romendro Khongsdier na ka tnad pule Antropology, u ba long u ba bit ban shimti ïa ka kam, hynrei kaba sngewsih ka long ba ka skulbah kam shym la bud ïa ka kyndon jong ka NEHU.
Ka HYC ka la dawa ba dei ban weng mardor ïa une u Prof. Saroj Kanta Barik u ba la shimti kum u VC bad dei ban bujli noh mardor da u Prof. R. Khongsdier ban long u VC ba shipor ka skulbah bad bynrap ba lada kane ka jingdawa kam urlong ka seng kan sa shim da kiwei pat ki sienjam.
