Shillong, Naitung 30
U Bah Moslander Marngar uba dei u Chairman ka Meghalaya Commercial Truck Owners and Drivers Association (MCTODA) u la pyntip ba ka seng kan sa lum ïa ka jingïalang paidbah ha u bnai ban wan kaba dei u Nailar 2026 ban ïakren ïa ka jingmih noh ki nongïalam kiba hakhmat.
Kum ban shu kdew, kine ki nongïalam ba hakhmat kiba la mih noh ki long u Bah Wanshwa Nongtdu uba dei u nongaiktien bad u Bah Peter Lawai uba dei u nongaibuit kiba la pynbna ha kine ki sngi ban mih noh na ka MCTODA.
Haba ïakren bad u Bah Moslander u la pynpaw ka jingsngewkhia haba u ïohi ïa ki nongïalam kiba la mih noh kumta un sa lum ïa ka jingïalang paidbah ka ban sa pynbeit ïa ka tarik bad ka por bad ïa ka jaka.
U la pynpaw ba ka jingeh baroh ba kum ka seng ka ïakynduh ka dei beit namar ka Sorkar bad ki company ki wanrah ïa ka rukom treikam ban ai bhah ïa ki trok ban kit dewbilat.
U la pynpaw ba lada ki dkhot ki kwah ban thaw seng thymmai kim dei ban knieh ïa ka bhah jong kiwei ki seng hynrei ki dei ban ïoh bhah kyrpang khnang ban ïoh kamai jakpoh.
U la ong ka jingai bhah ki company ka la buh jingeh namar u la ai nuksa ha ka shisngi ki company ki ai 40 tylli ki trok ïa kawei ka seng te kum ka MCTODA kaba don trok da ki hajar tylli kim lah ban ap ïa u laiñ.
U la pynpaw ba ha ka jingïalang paidbah yn sa lah ban pynbeit ïa ki kynrum kynram namar ha ka jingtreikam ka don beit ka jingïasngewthuh bakla.
U la pynkynmaw ba ka MCTODA ka dei ka seng jong ki nongñiah trok bad ki trai trok haba ka don jingeh kam ju khot ïa ka Executive Committee hynrei ka khot beit da ka jingïalang paidbah ban ïashai.
Kumban shu pynkynmaw ka MCTODA ka dei kawei ka kynhun kaba la lah ban pynkhih ïa ka Sorkar namar ka jingpyrshah ïa ki company pynmih dewbilat kiba la khñiot ïa ka dor bai kit hynrei mynta haba la dep pynbeit ka la don sa kawei ka jingeh haba ki company ki ai bhah ïa ki trok.
Ka MCTODA ka la dawa ha kine ki sngi ba kam ju bha ban ai bhah hynrei dei ban ailad shwa ïa ki trok kiba don hapoh ka Jylla hynrei kim shym la ngeit kaba la pynmih ïa shibun ki kynrum kynram.
