Jowai, Naitung 30
Ha ka sngi Palei ka la don ka jingkawang ‘tear gas’ jong ki pulit ban pynpra ïa ki paidbah kiba la ïalum na ka bynta ban khang ïa ki briew kiba thmu ban leit sha ka jaka pynlong public hearing jong ka Shree Cement Ltd ban pynlong da ka Meghalaya State Pollu-tion Control Board ha ka sngi Thohdieng ha ka shnong Daistong ha East Jaiñtia Hills.
Katkum ka durkhih kaba la saphriang, la ïohi ba ka la don ka jingïalum jong ki briew ha kane ka jaka ba la kynnoh ba ki la thmu ban khang lynti ïa ki briew kiba thmu leit sha ka public hearing.
Katkum ka jingïohi, ym shym la lah satia ban tip ïa ka daw kaba pura halor kane ka jingkawang da ki ‘tear gas’ ne tyndong lyer pynsat khmat sha ki paidbah. Ha kane ka jingkawang ‘tear gas’ la ïohi ruh ba kawei ka longkmie ka la lynniar bad pangjur ha ryngkat i khun.
Hashwa kane, ha ka por mynstep, la ong ba shi kynhun ki nongshong shnong ka Shnongrim ba hap hapoh ka Elaka Nongkhlieh ki la khang lynti ïa ki kali pulit bad ki briew jong ka Meghalaya State Pollution Control Board (MSPCB) kiba thmu ban leit sha ka public hearing jong ka Shree Cement ka ban long lashai ka sngi Thohdieng ha ka por 8 baje mynstep.
La ïohi ba ki la pyndap da u maw ba heh hapdeng ka surok kum shi bynta ban khanglad ïa ki kali ban jam sha shiliang.
Kane ka kynhun ki nongshong shnong ki la pynphai ïa ki kali da kaba pynpaw ruh ba ka public hearing ka dei lashai ka sngi, bad balei ki wan lypa mynta.
U Bah Phrangsngi Sutnga uba long uwei na ki nongshong shnong ka Shnongrim, u la ong ba ki pyrshah ïa ka public hearing namar ba ka company kam shym la ïakren pynbeit eiei halor kane ka kam bad ki nongrep, ha kaba u la pynpaw ba kane ka dei ka jingleh jubor ïa ka hok ki nongshong shnong khlem da ïakren ne pynbeit shwa bad ki nongshong shnong. U la ïathuh ba ki nongshong shnong ki dei kiba rep ha u Lum Syrman uba lah ban shah ktah na ka jingwan kane ka karkhana.
Haba kylli, u la ong ba ki nongshong shnong kin leit ban ïashim bynta ha ka public hearing lashai ka sngi bad kin pynpaw ïa ka jingpyrshah.
Hadien ka jingkhang lynti bad hadien katto katne minit ba la shah bat bad bthah ban phai noh ki kali pulit bad kali jong ki briew ka Meghalaya State Pollution Control Board (MSPCB) ha lad Shnongrim, la wan poi biang kham bun ki pulit sha katei ka jaka ba shah pakhang ban pyllait ïa ki kali ba shah bat.
Katba ki pulit ki dang pyrshang ban pyllait ïa ka kali jong ka MSPCB la tur shi kynhun ki nongshong shnong kiba la ïeng hakhmat kali ban ym shah ïaid shakhmat, bad ha kane ka por na ka liang jong ki pulit ruh ki la hap ban kyndat bad ñiat ïa ki briew ba pakhang.
