Shillong, Naitung 30
U nonghikai ba la rangbahduh hapoh ka skulbah North Eastern Hills University (NEHU) u Prof. Romendro Khongsdier u la pynpaw ka jingsngew lyngngoh halor ka jingïaid lait na u haba ïadei bad ka jingthung Vice Chancellor ba shipor ha NEHU.
Haba ïoh ban ïakren u Prof. Khongsdier u la ïathuh ba watla u dei uwei na ki Professor ba la rangbah tam ban ai jingshakri hapoh NEHU, hynrei ka bor ka shong ha u Visitor (President) ïano ban thung VC. “U Visitor u dei u khliehduh ka skulbah NEHU bad ngi hap ban kohnguh ïa kaei kaba u rai bad nga hap ban shu sngap,” u la ong.
Haba kylli, ka la don ne em ka jingtyrwa haba ïadei ka shuki VC, u Prof. Khongsdier u la ïathuh ba kam shym la don kano-kano ka jingtyrwa ne ka jingthoh haba ïadei ka shuki VC hapoh ka skulbah.
Haba kynthoh halor kane, u Prof. Khongsdier u la mynjur ba ka dei ka jingshisha kumba la kynnoh ka Hynñiewtrep Youths’ Council (HYC) ba ki la pynkheiñ ïa ka kyndon ka NEHU. “Katkum ka kyndon ki dei ban tyrwa shwa ïa nga bad ka dei ka jingshisha ba ki pynkheiñ ïa ka kyndon namar ba kam shym la don kano-kano ka jingkynjoh ktien ne ka jingpyntip ïa nga kum u Professor ba Rangbahduh ka NEHU” u la ong.
U Prof. Romendro Khongsdier u dei u nonghikai ha ka tnad pule jong ka Antropology bad u la sdang ban hikai hapoh ka skulbah naduh u snem 1997 bad ka jingshakri jong u kum u nonghikai hapoh ka Skulbah ka la kynjoh sha ka 29 snem.
Kum ban shu kdew ka Hynñiewtrep Youths’ Council (HYC) ha ka 29 tarik Naitung ka la phah da ka jingthoh sha u Lat ka Jylla u CH. Vijayashankar ban pynsngew halor ka jingïaid lait bad ka jingpynkheiñ kyndon ka tnad ïa ki kyndon aiñ ka NEHU, ha kaba ka la kyntu ruh ïa u Lat ban phah khubor sha ki bor ba dei peit ïa kane ka kam.
