Mairang, Naitung 30
Ha ka sngi Palei ka Ministry of Youth Affairs and Sports, Government of India, lyngba ka MY Bharat, Nongstoiñ ha ryngkat ka jingïatreilang bad ka Mairang Presbyterian Science College kala ïoh ban pynlong ïa ka District Level ‘Nasha Mukt Yuva For Viksit Bharat’ ha Auditorium Hall jong ka Mairang Presbyterian Science College.
Ka jingthmu jong kane ka prokram ka long ban pynshai bad pynsngewthuh sha ki samla halor ki jingma jong ka jingdih drok, duma bad kyiad ha ryngkat ka jingpynshai halor ka jingdonkam ban kyntiew ïa ka rukom im ba koit ba khiah bad ba don ka jingkitkhlieh.
Ha kane ka sngi u Additional Deputy Commissioner jong ka Eastern West Khasi Hills u Bah M Diengdoh u la long kum u kongsan ha ryngkat ka jingdonlang u Principal ka College Bah R Thangkhiew, ki nonghikai, ki samla pule bad kiwei kiba la khot sngewbha.
U Bah M Diengdoh haba kren kum u kongsan u la kyntu ïa ki samla pule ban kiar na ki jait jingdih pynbuaid kum ka kyiad bad ki drok bad ban wan shakhmat ban pynlong ïa ki prokram kiba long ka sur ban pynshai halor ki jingma jong ka jingngop ha kine ki jingdih ba sniew.
U la pynpaw ruh ba lyngba ka Social Media, ki briew ki lah ban ai jingmut ïa kiwei lyngba ki post ne ki video ban pynshai halor ka jingma jong u drok bad u la kyntu ban pyndonkam ïa ka Social Media ha ka rukom kaba dei ba biang namar lyngba kine, kiba bun ki briew kiba lah ban tip khambun halor ki jingma jong kine ki jingdih ba sniew.
Hapoh kane ka prokram, la sam ruh ïa ki khusnam sha ki nongjop jong ki jingïakop kiba bun jait kiba la pynlong shibynta jong kane ka campaign, ban ithuh ïa ka jingïashimbynta kaba kordor bad ka jingnoh synñiang jong ki ha kane ka jingthmu.
