Shillong, Naitung 30
Kawei ka longïing kaba don ha Shnong Mawïong, ka la shah tuh ha ki briew ki bym lah ban ithuh, ha kaba ki la shim ïa ka pisa kaba kot T.1 lak ha ryngkat ki ksiar.
Kane ka jingshah tuh, kadei kaba la jia ha ka janmiet jong ka 28 tarik u Naitung 2026.
Ka trai jong kane ka ïing ka la ïathuh, ba ïa ka ïing ka la dep khang tala bad u shabi ka la dep ban ai ha u khun ba u leit skul, hynrei ynda u khun u la wan na skul ha ka por 3 baje, u khun u la lap pynban ba la pynpait ïa u tala bad ki nongtuh ki la pynpra lut ïa ki jaiñ ki nep.
“Ha ka por ba u khun nyngkong jong nga u wan na skul, u lap ba u tala u la don ha madan bad ba la shah pynpait, bad u rung ha kamra, ki jaiñ baroh ki la shah pynpra lut bad ka duli ba thep ksiar bad pisa ka la plie rynghang,” la ong katei ka longkmie.
Hadien ba la ïoh jingtip halor kane ka jingjia, na ka liang ki dkhot ka HYC Mawïong Unit, ki la leit ban jngoh ïa katei ka longïing.
U Samla Kyntiewborlang Marsharing, Organising Secretary HYC Mawïong, u la kyrpad ïa ki bor pulit ba kidei ban shimkhia mardor halor kane ka jingjia, namar kamdei shuh ba tang shisien, hynrei ka la ju ïai jia na ka por sha ka por ka jingshah tuh.
“Man ka por ka HYC ka ju leit ban khynra ha kylleng ka Nongbah Shillong ïa kiba dih drok, bad ka seng ka don ruh ka jingsuba, ba kane ka jingshah tuh ha kane ka longïing, dei kiba dih drok,” la ong u Samla Kyntiewborlang.
