Shillong, Naitung 31
Ka Ïingdorbar Thawaiñ ka Meghalaya kan pynlong ïa ka Dorbar Synrai jong ka na ka bynta san sngi, kata naduh ka 24 tarik haduh ka 28 tarik u Nailar mynta u snem.
Ka ‘Business Advisory Committee’ (BAC) ka la pynbeit ïa ka almanak ha ka Sngi Thohdieng.
Haba kren sha ki nongthoh khubor hadien ba la wai ka jingïalang, u Lamphang ka Ïingdorbar Thawaiñ, u Thomas A. Sangma u la ïathuh ba ka komiti da kawei ka sur ka la mynjur ïa ka por ba la buh.
Ha kane ka jingïalang jong ka BAC, la ïadonlang ruh u Symbud Myntri Rangbah ka tnad Parliamentary Affairs, u Bah Prestone Tynsong, u Nongïalam ka Liang Pyrshah, u Mukul Sangma, u ‘Chief Whip’ ka Liang Pyrshah, Bah Charles Pyngrope, u Secretary ka Assembly, u Malthus S. Sangma bad kiwei-kiwei ki dkhot.
“Ka BAC da kawei ka sur ka la mynjur ïa ka jingtyrwa ïa ka almanak na ka bynta ka Dorbar Synrai,” la ong u Lamphang.
Ka Dorbar kan don 3 sngi halor ka ‘Government Business’ bad 2 sngi halor ka ‘Private Members’ Business’.
Halor ki jingsngewkhia jong ka jinglyngkot ka por, u Thomas u la kubur ïa ka jingduna jong ka por, hynrei u la pyntikna ba baroh ki dkhot kin ïoh lad ban kren.
“Ka jingai por ka long beit ka mat kaba kongsan. Ngan pyrshang katba lah ban ai lad lut ïa baroh ki dkhot khnang ba ki lah ban pynpaw ïa ki jingsngewkhia jong ki hapoh Ïingdorbar,” u la ong.
