Shillong, Naitung 31
U President ka Voice of the People Party (VPP), u Bah Ardent Miller Basaiawmoit, u la ong ba ka party ka la rai, ban leit tur sha Secretariat, ha ka 06 tarik u Nailar 2026, kumba ka la pynbna ha kine ki sngi ba la dep, ban ker tawiar ïa ka Secretariat.
“Kane ka jingleit ker tawiar ka VPP sha Seretariat ka long ban pyni ïa ka jingpyrshah ïa ka jinglong mutlop bad ka jingkuman ka Sorkar Jylla, haba ïadei bad ki mat kiba ktah ïa ki paidbah ka Jylla,” la ong u Bah Ardent haba kren sha ki lad pathai khuobr ha ka sngi Thohdieng jong ka taïew.
U Bah Ardent u la ong ba ka jingthmu ka seng ban leit tur sha Secretariat, kam dei ban leit thaw jingkulmar hynrei ban pynlong ïa ka jingker tawiar da ka lynti ba jai-jai.
Ka jingthmu leit tur ka VPP sha Secretariat kadei halor kiba bun ki mat, kiba kynthup ïa ka projek Lumpongdeng, ka jingkhuid ha ka jingpynlong ïa ka jingthung kam hapoh DSC bad MPSC, halor ka jingphah leh census bad ka ilektion duty ïa ki nonghikai, ban sangeh ka jingthung kam ïa kiba la shongthait, ban pynneh ïa ka khyndew ka shyiap u paidbah, ka jingkhang ïa ka jingwan rung tuh ki mynder bad kiwei pat ki mat jingdawa.
“U Conrad K Sangma, Myntri Rangbah ka Jylla ryngkat bad ki Myntri Sorkar, kidei ban don baroh ha Secretariat ha ka sngi wan tur ka VPP. Ngim leit rung sha Secretariat hynrei ngin shu ïakhih da ka lynti ba jai jai,” la ong u Bah Ardent.
U la ong, ba ha ka jingpynsngew ka party ïa ki mat jingdawa ka Sorkar kam shym la sngap, kumta ki la rai ban mih madan ban leit tur syndon sha Secretariat.
“Ngi kwah ba ka Sorkar kadei ban thaw lynti na ka bynta ki briew kiba trei ha ki kam kiba rit,” la ong u Bah Ardent.
Shuh shuh u la ong ruh, ba ka Sorkar ha kine ki por ba la dep, ka la dep ban kular sha ki paidbah haba ïadei bad u dewïong, hynrei mynta pat ïa u dewïong la khang bad ka la ktah ïa kiba im jakpoh lyngba u dewïong. “Kaei kaba ngi kwah ka long, ba ka Sorkar kadei ban thaw ki lad ki lynti na ka bynta ki rit ki ria, ba kin trei ha ka kam dewïong, hooid da kaba buh ruh da ki kyndon ba kumno ka jingtih ïa u dewiong kan long,” la bynrap biang u Bah Ardent. Haba ïadei bad ka jingpynjur ka jingïakhih paidbah nangne shakhmat, u Bah Ardent u la maham ba lada ka Sorkar kam ïohi ïa ka jingmih bad tur ka VPP sha Secretariat, kan pyni ïa ka jingbitar na kiba bun ki paidbah.
U Bah Ardent u la maham ruh, ba lada don kiba pynmih jingkulmar ha ka sngi leit tur sha Secretariat, ka VPP kan nym bahkhlieh. Namarkata, u la kyntu ïa ki longkmie longkpa, ki khun samla, ba kin leit ban ai ka jingkyrshan ïa ka seng ha katei ka sngi, ban pynpaw ïa ka jingbitar jong ki ïa ka jingleh jong ka Sorkar.
