Shillong, Naitung 31
U nongïalam ka UDP uba dei ruh u Myntri barim ka Sorkar Jylla ba dei peit ïa ka tnad jngohkai pyrthei u Bah Paul Lyngdoh u la buh jingkylli ïa ka por jong ka jingpyrshah ïa ka Shillong Ropeway Project, da kaba kylli balei ka jingkynthoh ka la mih hadien arsnem shiteng ba la sdang ban trei ha madan.
“Mynta ba uwei u briew un sngewthuh hadien ar snem shiteng ba kane ka long kaba sniew, ngam sngewthuh ïa ka jingmut jong kane baroh. Ngam tip shaphang ka jingthmu kaba don shadien jong ka jingpyrshah,” la ong u Bah Paul.
Haba ïada ïa kane ka projek, u la ong ba la sdang ïa ka da ka jingkyrpad jong ki nongshong shnong bad la ïoh ïa ka jingkyrshan jong u nongmihkhmat ba la jied jong ki.
“Ngin ym klet ba kane ka projek ka dei ruh ka jingthmu bad jingkyrpad kaba khraw kaba la leh da ka Raid Laban Pyllun, kaba ngi ngeit ba ka dei ka jingïalang jong baroh ki Dorbar Shnong jong kato ka thaiñ,” u la ong.
“Ïa kane ka projek la kyrshan ruh da u nongmihkhmat ba la jied jong ka thaiñ, u Bah Sanbor Shullai bad haba la sdang ïa ka kam ha kane ka jaka, shibun ki nongshna maw bad ki nongshong shnong jong ka Lawsohtun ki la treikam,” bynrap biang u Bah Paul.
U la ong ba kane ka Ropeway la khmih lynti ba kan ai jingmyntoi ïa ki kam jngohkai pyrthei bad ïa ki nongrep.
“Sngewbha sngewskhem ba kane ka dei ka projek kaba leit ban ai jingmyntoi ym tang ïa ki nongjngohkai pyrthei. Kam dei tang ban pynsuk ïa ka jingleit jingwan kaba sted jong ki nongjngohkai pyrthei, hynrei wat kito ki nongrep ruh kin lah ban kit ïa ki mar rep jong ki kaba shimpor tang 3 minit naduh ka jaka shaduh ka tduh jong u Lum Shillong,” u la ong.
U la batai ïa kane ka Ropeway kum kaba nyngkong eh ha kawei ka jaka lum ha ka ri.
“ka rukom ba la shim ka long kaba ïaryngkat bad kaba ngi don ha ki lum Alps ha Switzerland bad lada ka projek kaba heh kat kata ka la don kano-kano ka jingktah kaba sniew ïa ki lum Alps, ngin jin da la tip mynta,” u la ong.
Haba pynpaw ïa ka jingshah kynthoh ha ki social media, u la ong, “kan sa don beit ki nongkynthoh. Bad ka jingeh jong kiba bun ki briew ka long ba ki khang shwa ïa ka jingmut jingpyrkhat jong ki bad hadien kata ki plie ïa ka shyntur jong ki.”
“Nga la peit ïa ki jingkynthoh uwei u nongshong shnong u la pynpaw da kaba ong, ‘nga sah ha kane ka jaka bad kine ki shrieh ki la pynshitom ïa ngi la 15 snem.’ kumta kumno phin buh ïa ka jingkynnoh ha ka projek Ropeway?” u la kylli.
U la pynskhem shuh-shuh ba baroh ki jingmynjur katkum ka aiñ ki don ha ka jaka jong ki.
“Ïa kawei pa kawei ka kot la phah sha ka tnad jong ka Sorkar Pdeng, dei na kata ka daw ba khatduh ka la ïoh ïa ka muhor jong ka jingmynjur jong ka Ministry of Forest and Environment,” u la ong.
