Shillong, Naitung 31
Ki Synjuk Ki Rangbah Shnong Ka Ri Bhoi ha ka Sngi Thohdieng ki la kynduh ïa u Myntri ka tnad Bording, u Bah Metbah Lyngdoh ban ïakren ïa ki jingeh ba ïadei ka jingsam bording iletrik ha ka thaiñ Ri-Bhoi baroh kawei.
Haba kren sha ki nongthoh khubor u Secretary ka Synjuk u Bah P.B Sylliang u la pynpaw ba ka jingwan jong ki ban ïakynduh ïa u Myntri ka tnat bording ka long ban pynkynmaw haba ïadei ka jingthud palat ka rukom sam bording ha ka thaiñ kaba la ktah ïa ki paidbah ha baroh kawei ka them Ri-Bhoi.Shuh-shuh u la ïathuh ba ka Synjuk ka la ïoh ban pynpaw ïa ka jingsngewkhia haba ïadei ba ka Sorkar MDA ka la aiti noh sha ki Agency ban pynïaid ïa ki jingthungkam kiba ïadei bad ki Muster Roll, ki Lineman bad kiwei de ki kam ha MePDCL.
U la ïathuh ruh ba ka Synjuk ka ïoh jingtip ba ki don haduh 127 tylli ki kam Lineman kiba ka Agency ka khlem thungkam haduh mynta, “Haba ngi leit sha ka MePDCL ka kynñiat sha ka Agency bad haba leit ha ka Agency ka kdew ïa ka MePDCL, kane ka la buh jingeh ïa ngi ki paidbah nongshong shnong, ka jingthud ka bording ka dei na ka daw ka jingduna palat ki nongtrei” u la ong.
U Bah Sylliang u la ïathuh ba na ka liang u Myntri ba peit ïa ka tnat sam bording ha ka Jylla u la kular ban ïakren ban bthah ïa ka Agency ban pyntreikam katkum ka jingïasoi soskular hapdeng ka Agency bad ka Sorkar lyngba ka tnad ba dei peit. Nalor kine, ka Synjuk ka la ïoh ruh ban ïakren halor ka jingpynbor jong ka MePDCL ban teh ïa ki Smart Meter ha kaba ki paidbah haduh mynta kim pat lah ban pdiang, “Ka daw kaba pynlong ïa ki ban ym pdiang ka long namar ka jingkiew palat jong ka bai bording, ha kaba ki la don katto katne kiba la pdiang hynrei ki mad ïa ka jingkiew dor ba haduh T.5,000 bad T.6,000 ha ka shibnai” la ong u Bah Sylliang.
