Shillong, Naitung 31
Ka Hynñiewtrep Youths’ Council (HYC) ka pynrem jur ïa ka rukom pynlong ïa ka jingïalang pynsngew paidbah (Public Hearing), kaba dei na ka bynta ka projek tih mawshun jong ka Shree Cement Ltd. ha Lum Syrman, Daistong, Elaka Nongkhlieh, East Jaiñtia Hills District.
Ha ka kyrwoh ba la phah da ka Environment Cell, HYC-CEC, ka la ong ba kane ka Public Hearing, kam shym la long katkum ka rukom kaba dei hok hynrei ka la long pynban ka jingpynkheiñ ïa ki kyndon jong ka Environmental Impact Assessment (EIA) Notification, 2006, kaba bthah ba dei ban ailad ïa ki paidbah, ban ai ïa ki jingai jingmut ha shuwa ban ai ïa ka Environmental Clearance.
“Ka rukom ba la pynïaid ïa kane ka hearing, ka long kaba be-aiñ bad bakla shibun eh bad pyrshah ruh ïa ka hok u paidbah ha ka ri synshar paidbah,” ka la ong.
Ka HYC ka buh jingkylli, balei ba la pynlong ïa kane ka hearing ha ka por 8:00 baje mynstep, kaba la khanglad ïa bun ki nongrep, ki nongshong shnong bad kiwei ki kynhun kiba shah ktah ban wan ïa shim bynta.
“Kaba kham sngewkhia ka long ba katkum ki jingïoh jingtip, bun ki nongshong shnong kiba shah ktah bad ki sengbhalang, la khanglad ban rung sha ka jaka pynlong jingïalang, bad ïa ki briew kiba pyrshah ïa kane ka projek la kynnoh, ba la shah kem naduh ka miet sngi Palei. Ka jingpyndonkam ïa ki tear gas bad ka jingkhang jong ki bor pahara ïa ki paidbah ban leit sha ka hearing, ka pynpaw ïa ka jingpynkheiñ kaba jur ïa ki hok ba la ai katkum ka Article 19(1)(a) bad 19(1)(b) jong ka riti synshar ka Ri India,” la ong ka HYC.
Shuh shuh ka la ong, ba kaba nang pynkhuslai ka long ka jingïoh jingtip ba ïa ki surok paidbah la tih, la kawang maw, bad la pynjulor ïa ki jingdon jingem shimet (private properties), da ki nongkyrshan ïa ka projek, kaba la khanglad ïa ka jingleit ïa shim bynta sha ka hearing.
“Kine ki jingjia ki pynmih ïa ka jingartatien kaba jur halor ka jingnoh shiliang lypa jong ka bor synshar bad halor ka jingkhuid jingsuba jong ka kam hi baroh kawei,” ka la ong.
“Ym lah ban khot ïa ka Public Hearing, ba ka long kaba ïaid beit haba ïa kiba shah ktah la pynduh ïa ka lad ban kren da ka jingbyrngem, ka jingpyntieng bad ka jingkhanglad da ka bor. Kaei kaba la jia ha Lum Syrman, kam dei satia ka Public Hearing, hynrei ka Private Hearing hapdeng ka kompani bad kito kiba don ha ka bor, katba ïa ka sur jong ki paidbah, la shu kyntait noh shabar. Kano-kano ka Environmental Clearance lane ka jingmynjur kaba mih na kum kane ka rai ha ka Hearing kaba khlem ïaid ha ka hok bad lynti kaba dei kan ym lah satia ban pdiang bad kaba lah ban shah tynjuh ha ka aiñ,” la bynrap ka HYC.
Ka HYC ka la kdew ruh ba ym lah ban pyntyllun ïa ka roi ka par da kaba pynkheiñ ïa ki hok ba la ai da ka riti Synshar ïa ki paid riewlum trai shnong. Ki paidbah ki dei hok ban ïoh ïa ka jingshai bad ka jingïasyllok paidbah kaba shisha, ym da ka jingbyrngem, ka jingpynbor bad ka jingïashah liang ïa ki kompeni shimet.
