Shillong, Naitung 31
U Rangbah Shnong ka Shnong Umblai, Hima Sohra, kata u Bah Jlen Sohtun ha ka 31 tarik u Naitung 2026, u la mih shakhmat ban pynshai paidbah halor ka jingkynnoh u Bah Wellborn Bynnud pyrshah ïa u ba u la die ïa ka jaka, kaba la kam ba dei jong ka Hima.
Haba kren ha Shillong Press Club, u Bah Jlen u la ong ba kane ka jingdie ka Shnong ïa ka jaka, kadei lyngba ka jingtip lang baroh ki paidbah nongshong shnong, kaba la dep ban rai ha ka Dorbar Pyllun.
“Ka jingkynnoh u Bah Wellborn ba ka Shnong ka la die ïa ka jaka jong ka Hima, kadei kaba bakla,” u la ong.
U la ong ruh “Haba ka jaka ba dei jong ka Shnong, kadei hok ïa ka shnong ban die katkum ka jingtip lang da ka shnong, ym pat ban leh marwei.
Da kaba bynrap “Ka jingkynnoh u Bah Wellborn ba nga la die marwei ïa kane ka jaka, kadei kaba bakla bad ym lah ban pdiang, namar hashuwa ban die ïa kane ka jaka, la rai lang ha ka dorbar pyllun”.
Haba kylli, u Bah Jlen u la ong ba ka jingdie ka Shnong ïa kawei ka jaka, kadei namar ba ka shnong ka donkam pisa na ka bynta ka jingpyndonkam bad ka bit ka biang hapoh shnong poh thaw.
Namarkata, u la ong ba kane ka jingkynnoh u Bah Wellborn Bynnud pyrshah ïa u bad ïa ka shnong, kadei kaba la shu thok bad kaba lamler, “Kumta na ka liang jong nga kum u Rangbah Shnong ha ryngkat ki paidbah nongshong shnong, ngi pynrem jur ïa ka jingkynnoh u Bah Wellborn.”
“Ïa katei ka jaka la die ha ka dor ba 120 1sq feet, bad ïa ka pisa ka shnong kan ïoh ban pyndonkam ha ki liang baroh,” u la bynrap biang.
Ha kane ka sngi wan pynshai, la don ryngkat lang u Secretary Shnong Umblai, bad ki dkhot jong ka shnong, ha kaba kine ruh ki la mih sha khmat, ban pynshai sha ki paidbah halor ka jingshah kynnoh.
