Shillong, Naitung 31
Ka Federation of Khasi Jaiñtia and Garo Peoples (FKJGP), South East Khasi Border Circle hapoh ka jingïalam u Bah Kyrmen Shangdiar, President, ki la kyrpad na u BDO ka Mawsynram, ban peitlem haba ïadei bad ka jingïaid pathar ki trok ha surok, khlem da peit ka por.
Ka FKJGP ka la thoh sha u BDO ba u dei ban pynbeit da ka por ïa ki trok ban ïaid ha surok, namar ka la pynthud ïa ka leit ka wan ki kali, namar mynta ha shilynter ka surok narum Phlangwanbroi shaduh Umpung haduh Ranikor, ka dangïaid ka jingpyntrei ïa ka surok.
Ka jingïaid khlem por jong ki trok nalor ba kadei ka por slap, ha ka riat bad ka jingkhim ka surok bad da ka jingïaid palat pud ki trok, ka la pyndik ïa ka leit ka wan ki paidbah, khamtam ki khynnah skul bad don ki sngi ba kim lah shuh ban beh ïa ka por long skul, namar ka jingpynthud palat bad ka jingdheng kali bad katno tam sngew synei ïa ki kali kit nongpang ne ki kali kit ïa ki longkmie ba armet, la ong ka seng.
Kumta ka seng hadien ba la ïoh bun ka jingud bad jingujor na ki paidbah mardor, ka la leit ban pynsngew sha u BDO Mawsynram, ban phah shimkhia mardor halor kane ka jingeh bad ïaid khlem por ki trok.
Ka FKJGP, ka la ban jur bad kyrpad ïa u BDO, ba dei ban peit lem ïa ka jingbha jong ki paidbah bad ka kyntu ruh ïa ki bor ba dei peit, ban shimkhia bad ban ai ka jingkyntu ïa ki nongpynïaid jong ka Truck Association ban shimkhia ïa kane, lem kumta ka seng ka hap ban shim da kiwei pat ki sienjam.
Ka FKJGP ka la pynpaw ka jingsngewtynnad, ba na ka liang u BDO, u la kular ban sa shimkhia bad ban leh ïa kaba donkam na ka bynta ka bit ka biang jong ki paidbah, khamtam ha kum kane ka por.
Kumjuh na ka liang ka seng ha kum kane ka por ka pynpaw ruh ka jingai khublei ïa ka Sorkar bad ki nongmihkhmat, kiba la shimkhia ban pynïoh ïa kane ka jingshna pynheh ïa ka surok lane ban ai da ka surok kaba bha na ka bynta ka jingmyntoi jong ki paidbah ka dong ka thaiñ hi baroh kawei.
Nalorkata, ka seng ka la kyrpad ïa ki paidbah ban long kiba ïaishah ba dang dei ka por pynbha bad kumjuh ka kyntu ïa ki nongpynïaid trok, ban peit lem na ka bynta ka bit ka biang lang jong baroh kiba donkam ïa ka bylla ka sngi, bad ban burom markylliang ban nym long than ka jingpynwit ïa ka ïaid ïeng bad kumjuh ïa ki nongpyntrei surok.
