Nongstoiñ, Naitung 31
Ha ka step Sngi Thohdieng ha ka por kumba 4 baje eiei, ki pulit ka Nongstoiñ Police Station ki la ïoh pdiang ïa ka jingpyntip na u Bah Khraw Kharsyntiew na ka shnong Mawrok Porsohsat, ha kaba u Bah Elbin Kharbani (60 snem ka rta) bad ka Kong Seldaris Kharsyntiew (68 snem ka rta) ki la shah thombor bad shah pynmynsaw ha u briew u bym pat shym la lah ban tip satia u dei uei.
Ha ka khubor na u Superintendent of Police ka West Khasi Hills, la ong ba u runar uba la wan thombor ïa kitei ki shi kurim u la pyndonkam da ki tiar kiba nep bad katei ka jingjia ka la jia ha ka por kumba 2.00 baje mynstep ha ïingsah jong kitei ki shi kurim kaba don ha Mawrok Porsohsat, West Khasi Hills District.
Shuh shuh ka khubor na utei u heh pulit ka distrik ka la ong ruh ba ïa kitei baroh arngut shi kurim kiba la shah thombor la rah noh sha Civil Hospital da ki bahaïing hasem ha kaba u rangbah u la mynsaw jur na ki bynta jong ka khlieh, u bym tip briew shuh, katba ka longkmie ruh ka la mynsaw jur na ka jingshah dung bad la pynkit noh mar-mar sha Shillong bad kham hadien, la pyntip ba utei u rangbah u la khlad noh na ka jingjur palat ka jingmynsaw.
La ong ruh ba ka khun jong kitei ki shi kurim kaba dang 18 snem ka rta la jah rngai bad ym pat tip shano ka don bad kumjuh u kurim jong ka ruh u la jah rngai lang.
Na ka liang jong ki pulit, ki la pynngat mukotduma bad ka jingtohkit haduh mynta ka dang ïaid shakhmat bad ïa u suba runar ki pulit ki la pynlong ka jingthwet kaba jur.
