Shillong, Naitung 31
U nongïalam jong ka Congress Seva Dal ka Jylla, u Bah Banphira Basaiawmoit u la kynnoh ba ïa ka FCRA Amendment 2026 ba la wanrah da ka BJP ha ka jingïatreilang bad ka RSS ban wanrah ïa ki jaka pule, ki mar ki mata bad ki seng treimon sngewbha hapoh ka jingpeit ka Jylla, kan buh jingma ïa ki seng treimon sngewbha kiba dei ki rit paid.
Haba kren sha ki lad pathai khubor, u Bah Banphira u la ong, “Ngi don hangne mynta ka sngi namar ba ka aiñ kaba la thmu ban pynbeit ïa ki jingai sngewbha nabar ri kan sa shah pynwan dur ha ka rukom kaba lah ban synshar ïa ki jaka pule, ki jingdon jingem bad ki seng treimon sngewbha,” u la ong.
U la dawa ba ki kyndon thymmai halor ka “jingbei tyngka kaba sngewbha bad ka jingbei tyngka kaba neh” ki ailad ïa ka bor ba la buh kyrpang kaba la thung da ka tnad kam pohïing ban shimti ïa ki mar ki mata jong ki seng treimon sngewbha lada kim kohnguh, ban pynduh noh ïa ki, bad ban thep ïa ka jingmih sha ka Consolidated Fund of India.
Haba pynpaw ïa ki jingsngewkhia halor ka jingpyntreikam, u Bah Banphira u la ong ba ka jingpynkylla kam lah ban pynshai kaei ka ban jia ïa ki “jingdon jingem ba ïakhleh lang” kum ki jingtei skul ba la tei shi bynta da ki jingnoh synñiang jong ki nongshong shnong na ki kmie ki kpa bad ki samla pule barim.
U la buh jingkylli ruh ïa ka jingdonkam jong ka pisa kaba duna tam kaba T.10 lak, da kaba ong ba ki seng treimon sngewbha ki bym lah ban pynneh ïa ka ne pynlut ïa ka pisa ba la bthah ha ki kam ba la buh hapoh ar snem ki don ha ka jingma ban duh ïa ka laisen FCRA jong ki bad ban shah shimti ïa ki mar ki mata.
Shuh shuh u la ong ba ki seng treimon sngewbha kin nym lah shuh ban ai pisa nabar ri sha ki seng para kynthei kiba don ha kiwei pat ki bynta jong ka Jylla, da kaba kdew ïa ki kynhun kiba don ha Shillong kiba kyrshan ïa ki kam ha ki jaka nongkyndong jong ka Ri-Bhoi bad ka thaiñ sepngi jong ka Jylla Meghalaya.
Ka jingpynpoi ïa baroh ki pisa nabar ri lyngba ka tnad jong ka SBI’s FCRA ha Delhi, u la bynrap, kan pynslem ïa ka jingïarap kyrkieh ha ka por ba jia ki jingjia ba sngewsih.
U Bah Banphira u la kynnoh ba kane ka jingpynkylla ka dei kaba la thmu ïa ki jaka pule Khristan kiba ai jinghikai bad jingshakri ha ki jaka ba jngai ha kaba ka jingdon jong ka sorkar ka tlot.
“Kaei kaba ngi la ïohi ha kine baroh ka long ba ka aiñ ka bthah ban ot noh ïa ki kjat jong ki jaka pule ba pynïaid da ki rit paid ha Meghalaya,” u la ong.
U la kynthoh ruh ïa ka RSS bad ka BJP ba ki pynshlur ïa ka mat pyrshah ïa ka jingbitar jong ki stad saian, da kaba kdew ïa ka jingai pisa na ka bynta ban wad bniah halor ka sboh masi bad ka sniehdoh masi bad ka jingpynduh noh ïa ka Theory of Evolution na ki kot pule jong ka NCERT.
“Kumno ngin shaniah ïa ka seng kum ka RSS bad ka BJP kiba ha ka jaka ban pynshlur ïa ka jinglong stad saian ha ka imlang sahlang, ki ïaid ha ka lynti kaba pher bak-ly-bak?” u la kylli.
Haba pynïadei ïa ki jingkylla jong ka FCRA bad kiwei pat ki aiñ pdeng, u la ong, “Kane ka aiñ, ka FCRA, marwei kan ym pynduh ïa ka jinglong jong ngi, hynrei ka RSS bad ka BJP ki pyrshang da kaba ryntih ban pynduh jait ïa kano-kano ka jinglong kaba ngi don. Ki aiñ kum ka FCRA, CAA, kawei ka jaidbynriew kawei ka ilekshon, kawei ka jaidbynriew kawei ka ktien, kane ka pyni ban ot noh ïa ka jinglong kyrpang ki jaidbynriew rit paid.”
U la kyrpad ïa ki seng saiñpyrthei bad ki riew pawkhmat ha ka Jylla ba kin wan lang ha kawei ka shatri halor kane ka mat.
