Shillong, Naitung 31
U nongïalam ka UDP bad Nongaibuit ka tnad Social Welfare, u Bah Paul Lyngdoh ha ka Sngi Thohdieng u la ong ba ka jingpynkynriah ïa ki nongdie madan na Khyndailad ka long kum ka nuksa jong ka “jingpynroi sor kaba kyllum lang” kaba ai ki lad ki lynti ha ka jaka ban shu kyndang.
“Nga sngewkmen ba nga la long shi bynta jong ka kynhun. Nga la don bynta ban pynlong ïa baroh shi lynter jong ka Khyndailad kaba kylluid,” la ong u Bah Paul.
“Kane ka dei tang kawei ka bynta jong ka jingpynroi sor kaba kyllum lang ha kaba ngim shym la beh ïa ki briew, hynrei ngi la shna ïa kiwei pat ki jaka na ka bynta jong ki,” u la bynrap.
Katkum ka jingong u Bah Paul, ki jaka die jingdie kiba thymmai ki long kiba la pynbit-pynbiang da ki jingdonkam ba kongsan.
“Kito ki jaka ki don lut ïa baroh ki jingdonkam, kum ka um, ka bording, ki jaka leit bar, bad kiwei. Ki nongdie ki ïoh ruh ïa ki lad jingïada namarba kine ki dei ki jaka kiba la shna bha,” u la ong.
Haba kren halor ki jingshah kynthoh haba ïadei bad ki kam ha Khyndailad, u Bah Paul u la kdew ba ki jingsngew paidbah ki ïapher iwei-na-iwei.
“Haba la pynkynriah nyngkong ïa ki nongdie madan, ki briew ki ong ba ka Khyndailad ka la jar-jar eh. Bad mynta haba la don ki nongput-nongtem, phi ong ba ka Khyndailad ka la sawa palat. Te kiei ki lad kiba phi kwah?” u la kylli.
