Nongstoiñ, Nailar 02
Hadien ka jingïai thwet kaba jur bha, ki pulit jong ka West Khasi Hills District ki la ïoh ban kem noh ïa u briew uba suba donkti ban thombor ïa ki shi kurim kaba la jia ha ka por 2.00 baje dang step 31 tarik u bnai Naitung, 2026 ha ka shnong Mawrok Porsohsat ha West Khasi Hills.
Ïa kane la pyntikna da u Superintendent of Police (SP) jong ka West Khasi Hills u Bah HP Kharkongor, MPS ha ka sngi Saitjaiñ jong ka taiew.
U SP u la ong ba ïa utei u briew la ïoh ban kem noh ha ka por 8 baje mynmiet jong ka 31 tarik u bnai Naitung, 2026 na kawei na ki jaka ha khlieh ïew Nongstoiñ, kata hadien ka jingthwet kaba jur lem bad ka jingïatreilang jong ki shnong, ki VDP.
U SP u la ïathuh ruh ba ha ka jingtohkit jong ki pulit, une u briew u la kubur ba u la leit sha katei ka ïing bad u la ïathuh ruh ba u la ot shwa ruh ïa ki waiar ban pynlip ïa ka bording hapoh ka ïing bad u la phla ruh ba hadien ba u la dep ban thombor ïa kitei ki shi kurim u la ïalam noh ïa katei ka samla ryngkat bad u.
Shuh shuh la ïathuh ruh ba ïa utei u briew uba la tip kyrteng u Koldingstar Thongni, 22 snem ka rta bad kane ka jingkem noh jong ki pulit ïa utei u briew ka dei tang hapoh ka 24 kynta lyngba ka jingïatreilang ki shnong bad ki pulit ka Nongstoiñ, ki VDPCNA.
U SP u la ïathuh ruh ba u Koldingstar u dei ruh u briew uba la ju don case teng ha kiwei ki District bad u la ïa don ruh ka jingïashongkha la katto katne bnai bad katei ka samla kaba 18 snem ka rta.
Nangta, la ong ruh ba katkum ka jingtohkit jong ki pulit, ka long ba ki kmie ki kpa jong katei ka samla kim sngewtynnad ïa katei ka jingïadei ka jong ki bad kumba katto katne taiew ki khlem ïa shong lang shuh, bad la ong ruh ba ha ka jingtohkit bad ka jinglap ki pulit ka long ba u briew u leh ïa katei ka kam ka dei namar ba u dom ïa ka kmie u kpa jong katei ka samla ba kim shah ïa u ban ïa shonglang bad ka khun ka jong ki.
U Superintendent of Police ka West Khasi Hills u la ong ruh ba katba ka jingtohkit bad ka jingthwet ïa utei u briew bad ka jingwad ïa katei ka samla ka dang ïaid shakhmat la ïoh ïa ka jingtip ba katei ka samla kaba la jah ha katei ka sngi, kala wan phai ïing myn ha ka 31 tarik u bnai Naitung.
Shuh shuh u la ong ba ha ka jingtohkit, katei ka samla kala phla ba kala lait phet na ka kti utei u briew katba u dang ïoh thiah ha kawei na ki khlaw kaba don ha ka shnong Syllei Iawkhein ha West Khasi Hills, kaba u la ïalam ïa ka, hadien ba la dep ban thombor ïa ki shi kurim.
La ïathuh ba ka la phla ruh ba ha ka por ba ïoh thiah, katei ka samla ka la ïohlad ban phet bad ha kajuh ka por ka la ïoh ban knieh ruh ïa ka wait kaba la pyndonkam ha kaba thombor ïa ki shi kurim bad na ka liang ki pulit ruh ki la ïoh ban shimti noh bad la ïalam ïa katei ka samla ban leh ïa ka medical ha Civil Hospital Nongstoiñ bad mynta ka dang don ha katei ka jaka sumar ban ïoh ïa ka jingsumar kaba biang.
Lah ban kdew ba ha ka step jong ka 31 tarik u bnai Naitung ha ka por 4 baje eiei, ki pulit ka Nongstoiñ kila ïoh pdiang ïa ka jingpyntip na uwei u rangbah na ka shnong Mawrok Porsohsat, ha kaba u Bah Elbin Kharbani bad ka Kong Seldaris Kharsyntiew la kynnoh ba kila shah thombor bad shah pynmynsaw ha utei u briew uba la pyndonkam da ki tiar kiba nep bad katei ka jingjia kala jia ha ka por kumba 2 baje dang step jong ka 31 tarik u bnai Naitung ha ka ïing sah jong kitei ki shi kurim kaba don ha Mawrok Porsohsat WKHD.
Shuh shuh ïa kitei baroh ar ngut ki shi kurim kiba la shah thombor la pynkit noh sha Civil Hospital da kiba haïing hasem ha kaba ïa ka longkmie kala mynsaw jur na ka jingshah dung la pynkynriah bad pynkit noh mar mar sha Shillong katba kham hadien la pyntip ba u rangbah u la khlad noh na ka jingjur palat ka jingmynsaw.
Na ka liang jong ki pulit kila register ïa ka mukotduma hapoh ki kyndon 103, 109, 118 bad 140 jong ka Bharatiya Nyaya Sanhita (BNS), bad ka jingtohkit kaba bniah ka dang ïaid shakhmat.
