Shillong, Nailar 02
Ki nongïalam kiba la mih noh na ka Meghalaya Commercial Truck Owners and Drivers Association (MCTODA) kiba la mih noh ha kine ki sngi ki la ïoh ban thaw ïa ka seng thymmai kaba ki la ai All Meghalaya Trucks & Drivers Welfare Association ha kaba u Bah Wanshwa Nongtdu u la long kum u President bad u Bah Peter J Lawai kum u nongaibuit.
Haba ïakren bad u Bah Wanshwa Nongtdu u la ïathuh ba kaei kaba ki la mih na ka MCTODA kim kwah ban ong eiei hynrei kin ïakren ïa ki kam nangne shakhmat hadien ba ki la thaw ïa ka seng kaba thymmai.
U la ïathuh ba ha kane ka seng kaba thymmai ki don palat 300 ngut ki dkhot naduh ki trai bad ki nongñiah trok.
U la ïathuh biang ba ka thong jong ka seng ka long ban aikam aijam ïa ki trai bad ki nongñiah trok, ban ïarap ïa ka jingeh ki nongñiah trok haba ki ïaid ha surokbah haba don kiba lum pisa be-aiñ, ka jingshah khñiot ha ka dor bai kit, ka jingshah ñion beiñ ha ki nongwei haba ki leit shabar ka Jylla.
Shuh shuh u la pyntip ba mynshem snem ka la don jingthmu ban khang ïa ki trok kiba nabar kiba wan kit dewbilat hynrei namar bym ïasngewthuh jingmut ka la shu kut noh namar kine kiba shalan shabar uwei u malik u don palat 200 tylli ki trok, katba ïa ki trok na Jylla la ai bhah tang 120 tylli shi sngi.
“Ha ka 3 tarik mynta u bnai ngin leit ïakynduh ïa ki bor bahakhlieh ka NHAI bad ïa ka NHIDCL ban kyrpad ban shna ïa ki jaka sangeh ki trok ne ki lay-by namar ki trok ki shem jingeh haba ki mih na Lumshnong shaduh Jorabad ki hap ïeng ha petrol pump” u la ong.
Ha ka juh ka por u Bah Wanshwa u la ïathuh ba ka seng kan sa shong ïa ka Executive committee kaba nyngkong ha ka 3 tarik Nailar ban ïapyrkhat ïa shibun ki kam ban pynïaid shakhmat.
Na ka liang ki nongïalam ka MCTODA ruh ki la pynbeit ban pynlong jingïalang paidbah mynta u bnai Nailar ban ïakren ïa ka jingmih noh ki nongïalam kiba hakhmat kum u Bah Wanshwa Nongtdu uba dei u nongaiktien bad u Bah Peter J Lawai uba dei u adviser.
