Delhi, Nailar 02
Ka tnad Textiles kan rakhe ïa ka ‘National Handloom Day’ kaba 12 ha ka 7 tarik Nailar, 2026 da ka jingïalang ha ka ri ha Rashtrapati Bhavan Cultural Centre (RBCC), New Delhi, ban rakhe ïa ka pateng suh jaiñ bariewspah jong ka India bad ban ithuh ïa ka jingnoh synñiang ka kam thaiñ jaiñ sha ka jingkyntiew ïa ka kolshor bad ka ïoh ka kot jong ka ri.
Ka President jong ka India, ka Droupadi Murmu, kan plie pyrda ïa ka jingïalang kum ka Kongsan. Ha kane ka sngi yn ïadonlang ruh u Myntri Sorkar Pdeng ba dei khmih ïa ka tnad Textiles, u Giriraj Singh, u Myntri Khynnah ka Sorkar Pdeng ba dei peit ïa ka tnad Textiles, u Pabitra Margherita, ka Neelam Shami Rao, Secretary (Textiles) bad ka Dr. M. Beena, Development Commissioner (Handlooms).
Ha kane ka jingrakhe, yn ïashim bynta da ki nongïoh khusnam ‘Sant Kabir Handloom Award’ bad ‘National Handloom Award’ bad ki bahaïing hasem jong ki, ki nongthaiñ jaiñ na kylleng ka ri, ki dkhot jong ka ‘Award Selection Committee’, ki ’riewpawkhmat kiba don bynta bad ka kam suh jaiñ, ki heh Sorkar, ki nongmihkhmat na ki lad pathai khubor bad kiwei-kiwei kiba shah khot kyrpang.
Ka bynta kaba kongsan jong kane ka jingrakhe kan long ka jingai ïa ka khusnam ‘Sant Kabir Handloom Award’ bad ka ‘National Handloom Award’ na ka bynta u snem 2025. Baroh 22 tylli ki khusnam, kiba kynthup 3 tylli ki khusnam ‘Sant Kabir Handloom Award’ bad 19 tylli ki khusnam ‘National Handloom Award’, yn ai ïa ki nongthaiñ jaiñ kiba tbit namar ka jingnoh synñiang jong ki sha ka jingtrei kti, ka jingsaiñ dur thymmai bad ka jingnoh synñiang sha ka jingpynneh pynsah ïa ki dustur thaiñ jaiñ jong ka India.
Ha kane ka sngi, yn sakhi ruh ïa ka jingpyllait paidbah ïa saw tylli ki ‘Stamp’ kynmaw burom kiba rakhe ïa ka jingriewspah bad ki dustur thaiñ jaiñ ba ïar jong ka India.
Ha kane ka jingïalang yn pyllait paidbah ruh ïa artylli ki kot—”Earth. Root. Thread – Aal Dyed Handloom Textiles of Central India” bad ka ‘Handloom Awards Book 2025’.
Yn pynlong ïa ka jingpyni ïa ki tiar shna kti kiba la ïoh khusnam ha ki bynta ba shadien jong kane ka jingïalang. Ki nongwan jngohkai kin ïoh ruh ka lad ban sakhi ïa ki jingpyni ‘Live’ ïa ka rukom thaiñ jaiñ ‘Kani’ bad ka jingthaiñ jaiñ ‘Wall Hanging’, kaba pyni ïa ka jingïar bad ka jingtrei-kti jong ki dustur thaiñ jaiñ jong ka India.
Nalor ka jingïalang ba kongsan ha ka 7 tarik u Nailar, 2026, kiwei pat ki jingïalang ba kongsan kiba la pynkhreh ha ka ‘National Handloom Day’ ki kynthup ïa ki jingpyni, ki jingïalang (nongsaiñdur, IIHT) bad kiwei-kiwei.
Ka kam suh jaiñ jong ka India ka dang ïai bteng ban long kawei na ki lad ba heh tam jong ka ri ha ka jingïoh kam ïoh jam ha ki jaka nongkyndong kaba lah ban ïaineh, kaba kyrshan ïa ka kamai-kajih jong palat 35 lak ngut ki briew, ha kaba ki longkmie ki long palat 70% na ki nongtrei.
Nalor ka jingkongsan jong ka ha ka liang ka ïoh ka kot, kane ka kam ka dang long ka nongsumar ïa ki riti-dustur bariewspah jong ka India ha kaba ïadei bad ka kam jaiñ bad ka nongnoh synñiang kaba kongsan sha ki rukom pynmih jaiñ kiba pynneh-pynsah ïa ka mariang.
Ïa ka ‘National Handloom Day’ la ju rakhe man u snem ha ka 7 tarik u Nailar ban kynmaw burom ïa ka ‘Swadeshi Movement’ kaba la sdang ha ka 7 tarik u Nailar, 1905, kaba ai bor thymmai ïa ki karkhana hapoh ri bad ïa ka kam suh jaiñ jong ka India. Ka jingrakhe ka ithuh ïa ka jingnoh synñiang kaba ïai bteng jong ki nongthaiñ jaiñ sha ka kolshor jong ka ri bad ka jingkyntiew ïa ka imlang-sahlang bad ka ïoh ka kot.
