Shillong, Nailar 02
U Symbud Myntri Rangbah ba khmih ïa ka tnad PWD (Roads) Bah Prestone Tynsong dang shen u la pyntip ba ka Sorkar kala bthah ïa ka NHIDCL ban pyndep noh ïa ka Sub-Way hapoh ka por ba la buh khnang ban shah noh ïa ki kali ban ïaid lyngba ka surok Shillong-Dawki.
Dang ha ka taïew ba la lah, hadien ka jingïalang bishar kam jong ki projek surok bapher bapher u Bah Prestone u la ong ba ka jingïakren ka kynthup ïa ki projek ha kylleng ka Jylla Meghalaya, kynthup ïa kiba don ha Garo Hills bad ïa ka High-Speed Corridor.
“Ngi la don ka jingïakren kaba bniah halor ka jingïaid jong ki kam, ym tang ïa ka Shillong-Dawki hynrei wat ïa ki projek bapher bapher ha ka Jylla Meghalaya, kynthup ha Garo Hills, bad ïa ka High-Speed Corridor ruh,” u la ong. U Symbud Myntri Rangbah u la ban jur ba ka jinglah ban pynïasoh biang ïa ka bynta jong ka surok Shillong-Dawki ka long kaba kongsan namar ka jingdonkam na ka bynta ka khaïi pateng bad ka leit ka wan man kaba man sngi.
“Ha kaba ïadei bad ka surok Shillong-Dawki, ngi la shim ïa ka rai ban bthah ba ka NHIDCL ka hap ban pyndep ïa ka jingshna ïa ka Sub-Way hapoh ka 10 tarik Nailar. Ha ka 10 tarik Nailar ngi hap da kano kano ka lad ruh ban plie biang ïa ka jingleit jingwan jong ki kali na katei ka bynta ba shah rong ka surok,” la ong u Bah Prestone.
U la bynrap ba ha ka jingïalang la ïakren sani bha halor kiwei ki jingeh jong ki projek jong ka NHIDCL.
“Shaphang kiwei pat ki mat ruh, ngi la ïakren bad pynbeit ïa ki, kynthup ïa ki projek ha Garo Hills kiba dang don hapdeng ka jingpyntrei da ka NHIDCL,” u la ong.
