Shillong, Nailar 02
Ka Meghalaya Pradesh Congress Committee (MPCC) dang ha kine ki khyndiat sngi ka la ong ba ka la sdang ïaid bad trei napoh napoh na ka bynta ka ilekshon MP shiteng samoi na Shillong bad u kyrtong ban ïakhun ïa kane ka ilekshon un dei u MP barim Bah Vincent H Pala.
U Secretary ka MPCC Bah Manuel Badwar u la ong ba ka seng kam shym la kyrkieh ban pynlong ïa ki jingïalang kiba heh naba haduh mynta ka Election Commission ka Ri kam pat pynbna ïa ka tarik jong ka ilekshon.
“Ngi la long kiba thikna ban ïakhun ïa kane ka ilekshon. Hynrei namar ba ïa ki tarik ym pat ai na ka liang jong ka Election Commission, kumta ngi dang ïaid bad trei napoh napoh ïa mynta. Ngi kwah ba kane kan long kaba biang,” la ong u Bah Badwar.
U la ong ba ki mat ba kongsan kum ka mat FCRA, ka jinghiar jong ka pule puthi, ka hok jong ki rit paid, ka jingbym don kam don jam bad ka jingbym ïaryngkat ka jingroi ka ïoh ka kot kin long ki mat pdeng jong ka Congress ha ki jingïalap ilekshon.
“Ki paidbah ha Meghalaya ki ju thep vote da ka jingpyrkhat, ym tang da ka jingsngew. Ka bynta kaba khraw jong ki paidbah ka la sngewthuh lypa ïa kaei kaba jia ha ka ri,” u la bynrap.
U Bah Badwar u la ong ba ka seng ka la sdang ïa ka jingleit pynsngewthuh ha ki kynhun kiba rit ha kylleng ka nongbah Shillong bad kumjuh ruh sha kiwei ki thaiñ, bad ka dang ïaleh ban kiar na ki jingïalang paidbah kiba heh ha kane ka por ba mynta.
“Nga la don ka jingïalang ha Nongmensong ha kine ki sngi, ha kaba la sakhi ïa ka jingwan jong ki briew sha ka jingïalang. Ka kam ka dang ïaid ha baroh ki 36 tylli ki block bad 36 tylli ki konstitwensi. Ngi dang tei biang naduh tynrai,” u la ong.
U la bynrap ruh ba ka Congress kam pat shym la kwah ban pynklumar jingmut ha ki rynsan social media lane ha ki lad pathai khubor ha kane ka por kaba mynta.
“Ynda la dei ka por ban tei ïa ka jingïakhun bad ban leit sha ki jingïalang kiba heh, ngin sa leh ïa kaba dei. Ïa mynta hi, ngi ngeit ha ka jingleit ïakynduh markhmat ha madan ba kan nang pynkhlaiñ ïa ngi,” ong u Bah Badwar.
