Shillong, Nailar 02
Watla ka BJP ka dang slem ban pynbna ïa u kyrtong ban ïakhun ïa ka ilekshon MP Lok Sabha sha ka ïingdorbar thawain ka ri ka Parliament ban mihkhmat na Shillong Parliamentary Constituency hynrei ki kyrteng ki la paw ba ki don lai ngut kiba pan tiket.
Kine ki lai ngut kiba la paw kyrteng ban pan tiket BJP ki long u Bah Ernes Mawrie uba dei u President barim ka BJP Meghalaya State Unit, u Bah Wankitbok Pohshna uba dei u General secretary ka BJP Meghalaya State Unit ba mynta, ka Kong Arena Hynniewta kaba dei ka President ka BJP Meghalaya Mahila.
Katkum ki khubor ba nalor, kine ki lai ngut kiba la pan tiket ki dang don sa kiwei pat ki nongkitkam kiba la pan tiket ki bym shym la tip bad paw kyrteng.
Shuh shuh ki khubor ki ïathuh ba ka BJP kan sa pynbna ïa ka kyrteng ynda ka Election Commissioner ka ri India kan sa pynbna ïa ka tarik thep vote ha Shillong constituency.
Katba kiwei ki seng saiñpyrthei ki la dep pynbna lypa ïa u kyrtong kata ka NPP, Congress, VPP, UDP bad kaba sah mynta sa tang ka BJP kaba dei ka seng kaba synshar ïa ka Sorkar India.
Wat lada kitei ki lai ngut ki kyrteng ki don hakhmat ban pan tiket hynrei yn sa tip thikna ynda ki nongïalam ka BJP ki la ai jingpynbna ynda ki la pynbna ïa u kyrtong.
