Shillong, Nailar 02
Ka Meghalaya kala ïoh T.688 klur kum shibynta na ka jingai lypa ïa ka bhah khajna bala pyllait da ka Sorkar Pdeng ban ïarap ïa ki Jylla ba kin pynsted ïa ki capital project (jingai pisa ban kynshew sha ki jingdon jingem ne jingtei kiba kongsan) bad ka jingpynlut ha ki kam pynroi pynpar.
Ka Ministry of Finance ha ka sngi Saitjaiñ kala pyllait T.1,09,019 klur sha baroh ki Jylla kum ka instalment bynrap, kaba kham bun ban ïa ka jingai bhah khajna ba man u bnai kaba la dei ban ai ha ka 10 tarik Nailar. Ka Sorkar Pdeng ka ong ba kane ka jingpyllait lypa ïa ka khajna ka thmu ban pynkhlain ïa ka pla tyngka ka Jylla bad pynlah ïa ka Sorkar ba kan pyntrei sted ïa ki jingtei bad pyntreikam ïa ki prokram ba ïadei bad ka bha ka miat.
Napdeng ki Jylla ka thaiñ Shatei Lam-Mihngi, ka Assam kala ïoh bun eh ïa ka bhah kaba kot sha ka T.3,552 klur, bud sa ka Arunachal Pradesh T.1,476 klur. Ka Meghalaya ka ïoh T.688 klur, ka Tripura ka la ïoh T.699 klur, ka Manipur ka la ïoh T.682 klur, ka Mizoram ka la ïoh T.615 klur, ka Nagaland ka la ïoh T.524 klur bad ka Sikkim ka la ïoh T.365 klur.
Kane ka jingpyllait lypa ïa ka khajna la khmih lynti ba kan plie ka lad ïa ka Meghalaya ba kan pynïaid shakhmat ïa ki projek jingtei, ki lad pynïasoh sha ki jaka kyndong, ka pule dangle, ka koit ka khiah bad kiwei ki kam pynroi khlem da ap ïa ka jingsam bhah haduh ka 10 tarik Nailar.
