Shillong, Nailar 02
U Bah Allfondbirth Kharsyntiew, General Secretary ka Seng Kur Kharsyntiew Central Body bad ki bahaïing ha sem, ki la ïoh ban leit kynduh bad leit jngoh ïa ka Kong Sildaris Kharsyntiew, ka long kmie kaba la shah pom da ka wait ha u runar, uba la wan ban thombor ha ka ïingsah jong ki, ha Mawrok Phorsohsat, WKHD .
Ka seng ka pynpaw ïa ka jingsngewkhia bad jingsngewsih kaba khraw, ba kum kine ki jingjia ki wan ban jia ha ïing ka sem.
Ka Kur Kharsyntiew, ka pynpaw ruh ïa ka jingsngewsih kaba khraw, ha kaba u Kpa jong kane ka ïing u Padeng (L) Elbin Kharbani, uba la shah pynïap ha katei ka jingjia, ka Kur ka phah ka jingsngewlem sha ki Meikha na ka Kur Kharbani bad kadei ka jingjia kaba ka Kur kam sngewlah ban pdiang da lei-lei ruh.
Kumta na ka liang ka Seng Kur lyngba u Bah Allfondbirth Kharsyntiew, ka la pynrem jur ïa katei ka jingjia bad ong ruh, ba kadei ka jingleh riewkhlaw jong u tei u riew bymman, u bym don shuh ïa ka mynsiem ïatip lem.
“Kur ka kyntu ïa ki bor jong ka aiñ, ba dei ban set patok ïa u tei u runar shi jingim bad ym dei ban ai jamin dalei lei ruh. Lada ki bor jong ka aiñ ki lah ban leh kumta, kane kan wanrah jingshngaiñ ïa ka imlang ka sahlang bad khamtam ïa ki riew paidbah ka dong ka thaiñ jong ngi,” la ong u Bah Allfonbirth.
Namarkata, u la ong ba na ka liang ka Kur, ka don ka jingshaniah kaba skhem ha ki pulit bad ki bor jong ka aiñ ba kadei ban leh la ka jong ka kamram bad kadei ban pynshitom da ka ba tyngeh ïa u tei u runar.
