Shillong, Nailar 03
Ha ka sienjam kaba kongsan ban pynbha ïa ka jinglong-jingman jong ka lyer ha kawei na ki thaiñ (ba don karkhana) kaba jaboh tam ha India, ka Sorkar Jylla ka dang pynkhreh ban ïaid shakhmat ha ka ban pyndait ïa ki kor pynkhuid lyer ha Byrnihat hadien ka jingjop jong ka Proof of Concept (POC) kaba la leh ha ryngkat ka jingïasnohktilang bad ka Megh-alaya State Pollution Control Board (MSPCB).
Kane rukom pynkhuid lyer kaba thymmai, kaba la shna da ka Zero Carbon Tech24 Pvt. Ltd., ka dei kaba la ïoh jingbit, kaba khlem ‘filter’, ka kor teknoliji kaba pynkhuid hi dalade-ïalade, kaba treikam ha ryngkat ka jingpyndonkam ïa ka bording kaba duna, kaba pynlong ïa ka kum ka lad kaba lah ban pyndonkam ïa ka bording kaba biang bad kaba lah ban pynneh-pynsah na ka bynta ban pynduna ïa ka jingjaboh ka lyer shabar.
Ha ka por jong ka jingbatai, u Sandeep Sharma, Business Head, Zero Carbon Tech24 Pvt. Ltd lem bad u paralok jong u, u Abhijit Trivedi, Nongseng ka Atglow Technologies ki la pynpaw ïa ka jingsngewnguh ïa u Myntri Sorkar, u Bah Sosthenes Sohtun na ka bynta ka jinglong nongïalam ba ïohi jngai bad ka jingshimkhia jong u ban weng ïa ki jingeh haba ïadei bad ka jingjaboh ka lyer ha Byrnihat.
Ki la ai khublei ruh ïa ka Meghalaya State Pollution Control Board (MSPCB) kaba la ai lad ban pynlong ïa ka Proof of Concept (POC) bad kaba la pynneh ïa ka jingkhuid kaba pura da kaba ïasam ïa ki jingmih ne risol sha baroh kiba don bynta.
Ka POC ka la sei ïa ki jingmih ne risol kiba ai mynsiem, kaba pyni ïa ka jingduna kaba jan 45% ha ka jingjaboh jong ki pui-pui lyer hapoh ka jaka ba la buddien jong ka projek. Kane ka jingjop ka la pynskhem ïa ka jingshaniah ba ka teknoloji ka lah ban don ka bynta kaba kit jingmut ha ka ban pynbha ïa ka jinglong-jingman ka lyer ha ki sawdong-sawkun jong ka Byrnihat.
Haba kren ha ka por ba ai jingkren, u Sharma u la pynpaw ba ïa ka rukom pynkhuid lyer la pynwandur kyrpang na ka bynta ka jingtreikam ba shabar na ka por sha ka por ha ryngkat ka jingpynbha kaba tang khyndiat eh.
Ka jingpynwandur ba khlem ‘filter’ bad kaba pynkhuid hi dalade ka pynduna shi kat dei ïa ka jinglut ha ka jingtreikam da kaba pyntikna ruh ïa ka jingtreikam kaba khlem jingthut, kaba pynlong pat ïa ka, kaba biang na ka bynta ka jingpyndonkam kaba heh ha ki jaka karkhana bad ki jaka sor kumjuh.
Ka rai jong ka Sorkar Jylla ban ïaid shakhmat bad kane ka jingpyrshang ka pyni ïa ka jingkut jingmut kaba bteng jong ka ban ïoh ïa ka lyer kaba khuid, ka jingpeitngor kaba khlaiñ ïa ka mariang, bad ki lad tehlakam ki ban kham pyrkhing ïa ka jingjaboh ha ka shnong ba don ki karkhana.
Ki bor synshar ki ngeit ba ka jingpynïasoh lang ïa ki buit teknoliji bathymmai bad ka jingpyntreikam ïa ki kyndon kan ïarap pynbha ïa ka jinglong-jingman ka mariang bad ka koit ka khiah jong ki paidbah ha ka thaiñ.
Shuh shuh lada pyntreikam hok ha ka rukom kaba kham ïar, la khmih lynti ba ka jingpyndonkam ïa kine ki kor pynkhuid lyer kan ïarap shibun ban pynduna ïa ka jingjaboh ha kylleng bad sawdong ka Byrnihat, da kaba ai jingïaroh ïa ki jingpyrshang ba dang ïaid jong ka Sorkar Jylla bad ka Meghalaya State Pollution Control Board ban wanrah biang ïa ka lyer kaba khuid na ka bynta ki nongshong shnong.
