Shillong, Nailar 03
U Symbud Myntri Rangbah ka Jylla, u Bah Sniawbhalang Dhar ha ka Lah Sngi U Blei u la pynpaw ïa ka jingsngewlem halor ka jingjia shlei um ha Assam bad ong ba ka Sorkar Meghalaya ka long kaba la khreh ban ïakynduh bad ka (Assam) ban pynbeit lang ïa kino-kino ki jingeh kiba don hapdeng ki ar Jylla.
“Ka long kaba sngewsih haduh katta-katta, khamtam ha ka Jylla Assam. Ka la ktah shisha ïa ki paidbah, bad nga pynpaw ïa ka jingsngewlem sha kito kiba la duh noh ïa la ka jingim,” ong u Bah Dhar haba ïakren bad ki nongthoh khubor.
U Bah Dhar uba bat ruh ïa ka tnad pynroi sor u la ong ba u la pynsngew sha u Myntri Rangbah ka Jylla ba dei ban shong jingïalang noh kloi bad u Myntri Rangbah ka Assam.
“Nga la ong ïa u Myntri Rangbah ka Jylla ba ngin sa ïakynduh ïa u Myntri Rangbah ka Assam. Ngin sa ïakren bad ngin sa ïa pynbeit lang. Ngim don hangne ban kynnoh iwei-ïa-iwei. Ngi don hangne ban trei na ka bynta ki paidbah,” u la ong.
U Bah Dhar u la ban jur ba baroh ar tylli ki Sorkar ki don ka histori ban weng ïa ki jingeh da kaba ïatreilang, khamtam eh ïa kito kiba ïadei bad ki lad pynïasoh.
“Nga kren shai, lada don kano-kano ka jingeh ha surok ne ha surokbah, ngi kum ka Sorkar, ne baroh ar tylli ki Sorkar, ngin pynbeit lang ïa ka. Kam don jingeh eiei ruh,” u la bynrap. Haba kylli halor ka jingthmu ban ïakynduh, u Bah Dhar u la ong ba ïa ki jingïakren yn sa pynlong ha ka rukom kaba biang ban wad ïa ka lynti kaba biang tam ban ïaid shakhmat.
“Baroh arngut ngin sa ïakynduh bad ngin sa ïakren ha ka rukom kaba dei. Ngin pyrshang ban wad ïa ka lynti kaba bha tam ban pynbeit ïa kane ka kam. Ngi long kiba kloi na ka bynta kata,” u la ong.
