Jowai, Nailar 03
Ki seng ba don ha ka Liang Pyrshah ha Jaiñtia Hills Autonomous District Council (JHADC) ki la aipor shi sngi ïa u Chief Executive Member (CEM) jong ka Council ban pynkiew ïa ka bhah ai skhim na ka 20 lak tyngka sha ka 50 lak tyngka mar uwei u MDC na ka 16th Finance Commission lym kumta yn mad ïa ki jingïakhih.
Ki Liang Pyrshah kiba kynthup ïa ka Congress bad Voice of the People Party (VPP) ki la phah ïa ka shithi sha u Chief Executive Member (CEM) ka JHADC haba ki la kynnoh ba ka jingsam ïa ki skhim jong ka Finance Commission ka long kaba la pynkylla khongpong bha ha ka liang ka kynhun synshar, kaba la pynlong ïa ki nongmihkhmat jong ka Liang Pyrshah ban ïoh ïa ka bhah kaba kham rit palat.
Ki MDC ki la ong ba watla ki sngewnguh ïa ka jingpynbiang ïa ki skhim na ka bynta ka jingmyntoi jong ki nongthep vote, hynrei ki pyrshah ïa kaei kaba ki batai kum ka “jingleh shiliang khmat” ha ka jingsam ïa ki skhim hapdeng ka kynhun synshar bad ka liang pyrshah.
“Ngim pat ju dawa ban ïoh ïa ka bhah kaba mar katjuh. Kaba ngi dawa ka long tang ka jingsam ïa ki skhim paidbah ha ka rukom kaba ïadei hapdeng baroh ki dkhot jong ka JHADC,” ki la ong.
Ki MDC ka Liang Pyrshah ki la ong ba baroh ki nongmihkhmat ba la jied, khlem da kheiñ ïa ka seng saiñpyrthei, ki don ka jingkitkhlieh kaba mar katjuh ïa ki nongthep vote jong ki bad dei ban leh hok ïa ki ha kaba sam ïa ka pisa paidbah.
Ki la kynnoh ba na ka 28.5 klur tyngka kaba la mang sha ka JHADC hapoh ka 16th Finance Commission, ïa ki 10 ngut ki MDC na ka Liang Pyrshah yn ïoh tang mar 20 lak tyngka marwei, katba 26.5 klur tyngka yn ai sha ki 19 ngut ki MDC jong ka kynhun synshar NPP.
Katkum ka jingong jong ka Liang Pyrshah, kane kam mut ba kan mang kumba 1.36 klur tyngka uwei pa uwei na ka bynta ki 19 ngut ki MDC ka Liang Synshar, haba ïanujor bad 20 lak tyngka uwei pa uwei na ka bynta ki 10 ngut ki MDC ka Liang Pyrshah.
Haba buh jingkylli ïa ka jingbym ïahap, ki MDC ki la ong ba ka pisa jong ka Finance Commission ka dei na ka bynta ka bha ka miat bad ka roi ka par jong ki paidbah bad dei ban sam katkum ka jingdon jong ki nongmihkhmat ba la jied, khlem da kheiñ ïa kano kano ka seng ba ki mihkhmat.
Ki la kdew ruh ïa ka Khasi Hills Autonomous District Council (KHADC), kaba la kam ba ïa ki skhim kiba hap hapoh ka Finance Commission la sam ïa baroh ki dkhot baroh kiba la shah jied.
Ka Liang Pyrshah ka la dawa ba dei ban pynkiew ïa ka mang pisa na ka bynta uwei pa uwei na ki 10 ngut ki MDC Liang Pyrshah sha ka 50 lak tyngka bad ba ïa ka rai ba la pynkylla thymmai dei ban pyntip da ka jingthoh hapoh ka 4 tarik u Nailar 2026. Ki la maham ba ka jingbym lah ban pynbeit ïa katei ka jingdawa kan pynbor ïa ki ban shim ïa ki sienjam kiba donkam pyrshah ïa kaei kaba ki khot ka “jingleh kmie nah” da ka Executive Committee jong ka JHADC kaba la ïalam da ka NPP.
