Shillong, Nailar 03
U Symbud Myntri Rangbah ka Jylla Bah Sniawbhalang Dhar ha ka sngi Nyngkong u la ong, ka jingkhang jong ka Sorkar ka plie ïa baroh ki seng saiñpyrthei bad kyntu ruh ïa ki nongïalam kiba la jied da u paidbah ba kim dei ban shu pynlong ka jingïa-khih ïaid paidbah namar la jied ïa ki ba kin kren ïa ki mat ba ïadei beit-beit bad ka Sorkar.
Haba kynthoh ïa ka jingrai jong ka Voice of the People Party (VPP) ban tur sha Secretariat ha ka 6 tarik Nailar, u Bah Sniawbha u la ong ba ka jingïakren ka dei ka lynti kaba biang eh ban weng ïa ki jingeh.
“Ha ka jingshisha, kam donkam ïa ki VPP ban wan tur paidbah. Ki lah ban wan bad aiti ïa ka dorkhas ha ka rukom kaba dei sha u Myntri Rangbah. Ngi lah ban ïakren bad ïathir, kaba dei ka lynti ba kumno ngi pynïaid ïa ka Sorkar,” la ong u Sym-bud Myntri Rangbah haba ïakren bad ki nong-thoh khubor.
U la ban jur ba kum ki nongmihkhmat ba la jied da u paidbah ki long laitluid ban ïakynduh ha kano-kano ka por ïa ka Sorkar.
“Ka long kaba shai, lada don kino-kino ki mat ba kyrkieh na kino-kino ki seng saiñpyrthei, ki don ïa ka hok ban ïakynduh ïa u Myntri Rangbah lane ka Sorkar. Ki lah ban wan ha kano-kano ka por. Lada ki wan bad buh ïa ki mat lane ki jingeh jong ki, ngin sa ïakren. Kam don jingeh eiei ruh em,” u la ong.
“Baroh ki MLA bad MDC ki dei ki nongïalam paidbah. Ki don ïa ka hok ban ïakynduh ïa u Myntri Rangbah bad ka Sorkar, bad ka jingkhang ka long kaba plie beit ïa ki baroh 24 kynta,” bynrap u Bah Sniawbhalang.
U la ong ba ka Sorkar kan pdiang ïa ka VPP na ka bynta ki jingïakren watla ka wan tang kum ka kynhun kaba rit ruh.
“Lada ki wan tang 3 ne 5 ngut ki nongïalam ruh ngin pdiang beit ïa ki, kumba ngi ju leh bad kino-kino ki kynhun ba ïakhih. Lada wan mano-mano ruh, ngi ju pdiang beit ïa ki. Ai ba u Myntri Rangbah un pynbeit,” u la ong.
U Bah Sniawbha u la buh jingkylli ïa ki nongrim ha lyndet ka jingkhot ïa ka jingïakhih paidbah halor ki mat kiba lah ban ïakren ha ki jingïalang.
“Shu buh lada dei ïa ki mat ba rit ba ria ruh ngi hap ban khot ïa u paidbah ban tur sha Secretariat, kumta kaei ka jingmut ba ki paidbah ki jied ïa ngi?. Ngi la shah jied ha u paidbah ban mihkhmat na ka bynta ka jingeh jong ki. Ïa ki mat barit, lada ngi khot ïa u paidbah ban ïamih bad ïatur sha Secretariat, kane kam dei satia ka lynti,” u la ong.
“Ka dei ka kamram jong nga kum u MLA ban ïakynduh ïa ka Sorkar ban ïakren ïa ki jingeh jong ka constituency jong nga,” ong u Bah Sniawbha.
Shuh shuh u la pynpaw ruh ba bun na ki mat bala pynpaw da ka VPP ki dei kiba la don hapoh ka jingïakren bad ka Sorkar kala kut jingmut ban pynbeit ïa ki na ka bynta ka bha ka miat jong u paidbah.
