Shillong, Nailar 03
Ki runar kiba la kah durkhmat bha ïalade ha ka sngi Nyngkong ki la leit ban kawang da u petrol bomb ïa ka ophis jong ka Meghalaya State Pollution Control Board (MSPCB) kaba don ha Shillong.
Katkum ka tyllong khubor la ong ba kine ki runar ki la wan da ka scooty bad katkum ka durkhih na ka kor CCTV la ïohi ba ki la don lai ngut, ha kaba ar ngut ki la rung shapoh ka phyllaw jong ka ophis MSPCB bad tang hadien katto katne ki la mih bad mareh hadien ba la dep ban kawang ïa u petrol bomb.
La ïathuh ba kane ka jingshah kawang petrol bomb ka la jia ha ka por hapdeng ka 12 baje bad 12:30 shiteng sngi.
Ha kane ka jingleit rung shapoh ka phyllaw jong katei ka ophis, ki runar kila kawang petrol bomb ha artylli ki jaka hapoh ka phyllaw jong ka MSPCB hashuwa ba kin phet krad. Ha kane ka jingshah kawang petrol bomb, ym shym la don kano-kano ka jingjulor ne ka jingmynsaw hynrei tang ka jingpynsniew dur noh ïa ka rong jong ka ophis.
“Ngi la ujor ïa ka ejahar ha thanad Laitumkhrah. Ki Pulit bad ka kynhun Forensic kila wan poi mar-mar sha ka ophis ka MSPCB ban lum ïa ki sakhi satar,” la ïathuh ki briew ka ophis.
Haba pynthikna halor kane ka jingjia, u Superintendent of Police (City) Bah Dangsan Khyriem u la ong, “Ki don artylli ki petrol bomb ba la kawang. Ka Board kan sa ujor ïa ka ejahar bad hadien ba dep kane, ngin sa register ïa ka case. Ka jingtohkit kala ïaid ban thwet bad kem ïa ki briew kiba donkti.”
Ka kynhun Forensic kala lum ïa ki sakhi bad pynthikna ba kine ki dei ki petrol bomb.
Haba kylli la kane ka jingjia ka don jingïadei bad ka jingkulmar kaba mih na ka public hearing ka MSPCB na ka bynta ka projek tih mawshun ka Shree Cement ha Lum Syrman, u SP City u la ong ba ka dang kloi palat ban ong eiei ïa kane.
“Ngam don jingtip. Kane ka dei shibynta jong ka jingtohkit,” u la ong.
Ki pulit ki dang tohkit ïa ki video CCTV na katei ka jaka bad ki jaka ba marjan bad kila pynlong ïa ka jingthwet kaba jur ïa ki briew ba donkti ha kane ka kam.
