Shillong, Nailar 03
Ka ophis u Chief Engineer ka tnad Public Health Engineering (PHE) ka la pan por ar sngi ba kan pyllait ïa ka tulop jong ki nongtrei Muster Roll kiba trei ha ki shlem treikam bapher-bapher jong ka tnad PHE.
Kane ka jingpan por u Chief Engineer ka tnad PHE ka long hadien ka jingïakynduh ki nongïalam jong ka Joint Action Committee Muster Roll Union (JACMRU) ha ka 3 tarik Nailar 2026 ha ka ophis treikam jong u kaba don ha Lachaumiere, Shillong.
Ha ka jingïakren sha ki nongthoh khubor u Bah Khroo L Pariat u ba long u Adviser ka JACMRU u la ïathuh ba na ka liang u Chief Engineer ka PHE u la pyntip ba ka ophis ka la pyllait ïa ka pisa sha ki shnat treikam ba don ha ki District bapher-bapher na ka bynta u bnai Ïaïong, Jymmang, Jylliew bad Naitung ha ka 30 tarik u Naitung 2026.
Shuh-shuh u la ïathuh ba na ka liang u Chief Engineer u la pyntip ba ka tnad ka la pyntreikam ïa ka dor bylla sngi lane ka VDA naduh ka 1 tarik u Ïaïong 2026, ha kaba ki nongtrei Muster Roll kiba dei ki Unskill kin ïoh ïa ka jingsiew ha ka dor ba T.555 tyngka.
Haba ïadei ka tulop ba ki dei ban ïoh na ka liang u Chief Engineer u la kyrpad ba kin ïaishah bad ka ophis sa kumba ar sngi eiei, da kaba pynpaw ba ki nongtrei ka ophis ki dang ïaleh ban pynpoi ïa ka pisa sha ki Bank Account jong ki nongtrei Muster Roll.
U Bah Khroo haba bynrap ïa kane u la ong ba kin ïai ap kumba la kular u CE ban pyllait hapoh ar sngi ïa ka tulop, hynrei lada hadien kine ki ar sngi ka pisa kam poi ha ki Bank Account, ki nongtrei Muster Roll kin sa shim da kiwei pat ki sienjam da kaba kin sangeh treikam bad lada don kano-kano ka jingeh, ka Sorkar hi ka ban shim ïa ka jingkitkhlieh.
