Shillong, Nailar 03
Ki pulit ka Meghalaya ki la dep ban register case hadien ba ki ar ngut ki briew kiba la kah durkhmat ki la kawang petrol bomb ïa ka ophis treikam jong ka Meghalaya State Pollution Control Board ha Lumpyngngad ha ka sngi Nyngkong.
Katkum ka jingïathuh jong u Superintendent of Police (SP) ka East Khasi Hills Bah Vivek Syiem, kane ka jingjia ka la jia ha ka por kumba 12:10 eiei mynsngi, ha kaba ar ngut ki runar ki la rung sha phyllaw jong ka MSPCB bad ban kawang petrol bomb ïa ka building.
Une u petrol bomb u la dei tang ha ka bynta ba shabar ka kynroh, ba la shu pynjngum noh ïa ka rong. Ym don ka jingmynsaw lane ka jingjulor.
“Mar ïa ïoh ïa ka jingtip, ki pulit ki la leit sha katei ka jaka. La khot lang ruh ïa ka Crime Scene Unit sha kane ka jaka ban lum ïa ki sakhi satar bad shimdur ïa ka jaka,” la ong u Bah Vivek ha ka kyrwoh.
La dep ban register ïa ka case hapoh thanad Laitumkhrah, kata lyngba ka Case No. 121(08)2026 hapoh ka sections 324(3)(6)/326(g)/3(5) jong ka BNS. Ka jingtohkit halor kane ka kam la pynïaid shakhmat, la bynrap u SP.
Shuh shuh u SP u la ong ba la pynjur ka jingpahara ha phyllaw jong ka Meghalaya State Pollution Control Board.
Kumjuh ruh na ka liang jong ki pulit ka district ki dang trei shitom ban ithuh durkhmat bad kem ïa ki runar kiba donkti ha katei ka jingjia, la ong u SP.
