Shillong, Nailar 03
U Symbud Myntri Rangbah ka Jylla ka tnad kam pynroi sor, u Bah Sniawbhalang Dhar ha ka Lah Sngi U Blei u la ong ba ka Sorkar Jylla kan sa pynkynriah noh ïa ki nongdie madan na Laitumkhrah hapoh ka 17 tarik u Nailar, da kaba bynrap ba la dep phah ‘notice’ (halor kane) bad ïa kane ka kam la ïaid shakhmat hadien ka hukum jong ka ïingbishar.
“Shen, ngin sa ïaid shakhmat bad kane ka kam. Ngi la dep phah ‘notice’ sha ki. La dei ban pynkynriah noh ïa ki hapoh ka 17 tarik u Nailar. Ka don ruh ka hukum jong ka ïingbishar,” la ong u Bah Dhar haba kren bad ki nongthoh khubor.
U Symbud Myntri Rangbah u la ong ruh ba ka tnad ka ïatreilang bad ki nongdie madan ban pyntikna ïa ka jingïaid beit ïaid ryntih jong ki kam ki jam.
“Ki ophisar jong nga ki don ha ka kam. Ngi dang ïakren bad ki bad nga tharai ba baroh kan long kaba manbha. Kumba ka long mynta, baroh ki kam ki ïaid beit ha ka lynti kaba dei,” u la ong.
Halor kiwei pat ki jaka die jingdie na ka bynta ki nongdie madan ha Laitumkhrah, u Bah Dhar u la ong ba la pynithuh ïa 2 tylli ki jaka.
“Ngi la pynithuh ar tylli ki jaka – kawei, ha ka jaka pynïeng kali ha Dhankheti bad kawei pat ha ki bynta jong ka Bungalow ki ‘riew shimet. Ha ka jingshisha, ka dei ka jaka kaba biang bha na ka bynta jong ki. Lada don ki jingduna hangne-hangtai, lane lada don ka jingbym biang kumba ki la khmih lynti, ngin sa khmih bniah ïa kine kiei-kiei baroh,” u la ong.
Ka Sorkar ka dang ïaid shakhmat ruh haba ïadei bad ki jingpynkynriah ha kiwei pat ki bynta jong ka sor ha la ki jong ki jong ki kylla, la bynrap u Bah Dhar.
“Kajuh ka long na bynta ka Motphran. Ngi la dep leh ïa kane ha Jail Road. Ngi la pynkynriah ïa ki sha Polo bad hakhmat ka SBI. Hadien kata, ngin sa ïakren sa ïa ka Motphran bad ka GS Road. Yn leh ha la ki jong ki jong ki kylla. Na ka bynta ka GS Road ruh, ngi la pynithuh ïa ka jaka kaba don hajan ka jaka pynïeng kali ha Ïewduh,” la ong u Symbud Myntri Rangbah.
