Shillong, Nailar 04
Ka Sorkar Meghalaya ka la pynbna ba ïa ka tulop jong baroh ki nongtrei ka VB-G RAM G bad ka VB-REGLMS na ka bynta u bnai Naitung, 2026 yn sa pyllait hapoh kine ki ar sngi ban wan.
Kane ha kawei ka liang ka la wanrah ïa ka jingsngew suk mynsiem ha ki nongtrei kiba la shah ktah hadien ka jingkylla na ka MGNREGA.
Katkum ka kyrwoh ba la pynmih da ka State Rural Employment Society, la ïoh ïa ki jingmang na ka bynta ka jingpynïaid kam na ka tnad pynroi nongkyndong ka Sorkar Pdeng, ka ban ïalam pat sha ka jingpyllait ba mardor ïa ka jingsiew jong une u bnai.
Kane ka jingpynbeit kan bteng naduh u bnai Naitung, 2026.
U Mission Director, SRES, u Sibhi Chakravarthy Sadhu u la ong ba ka Jylla ka la mad ïa katto-katne ki jingeh ha ka ban pynkhuid ïa ka tulop, ka TA/DA bad kiwei-kiwei ki jingsiew ba ïadei bad ka jingpynïaid kam hadien ba la pyndam ïa ka MGNREGA bad ba la pyntreikam noh da ka VB-G RAM G/VB-REGLMS ha Meghalaya.
Haba kren shaphang ki jingsiew kiba sahteng, u Sadhu u la pynpaw ba ka tnad ka dang ïakren bad ka MoRD na ka bynta ban “pyllait noh kloi ïa baroh ka tulop, ka TA/DA bad kiwei-kiwei ki bynta jong ka jingpynïaid kam kiba dei ban siew haduh ka 30 tarik u Jylliew, 2026” na ka bynta ki nongtrei ki bym pat ïoh ïa ka jingsiew na ka bynta u Ïaïong-Jylliew ne Jymmang-Jylliew, 2026.
U la bynrap ba lada pynslem shuh-shuh ïa ki jingmang ka Sorkar Pdeng, “yn ai katto-katne ka jingïarap lyngba ki jingdon-jingem ka Jylla,” kumjuh kumba la leh ha u snem 2025 ha kaba “ïa ka tulop jong ki nongtrei na ka bynta 1-2 bnai ruh la pynlong kum ki jingpynbeit shipor lyngba ki jingdon-jingem jong ka Jylla.”
Ka kyrwoh ka la pynshai ba “Baroh ka tulop la pynkhuid haduh u bnai Lber, 2026 bad ha katto-katne ki distrik haduh u bnai Ïaïong, 2026, bad na ka bynta ki bnai kiba dang sah, la leh ïa baroh ki jingpyrshang ban pyntikna ba la pynbeit ïa ki jingsiew ba sahteng.”
Ka jingpynshai ka la wan ha ka por ba ka VB-G RAM G bad ka VB-REGLMS ki bujli ïa ka MGNREGA ha ka Jylla, ha kaba ka Sorkar ka dang ïaleh ban pynbeit ryntih ïa ka jingsiew bad ki rukom pynïaid kam na ka bynta ka jingai kam ai jam ïa ki nongtrei ha nongkyndong.
