Shillong, Nailar 04
Ki nongïalam ka Hynñiewtrep Jail Road Street Vendors Association (HJSVA) ha ka jingïalam ka Kong Clarissa Sohtun, President, ha ka 04 tarik u Nailar, 2026, ki la leit ban kynduh ïa u Bah Sniawbhalang Dhar, Symbud Myntri Rangbah ka Jylla bad Myntri ka tnad Urban Affairs, ban ïakren halor ki mat jingdawa jong ki.
Haba kren sha ki lad pathai khubor, ka Kong Clarissa ka la ong, ba ka jingkwah jong ki ka long, ban shong die jingdie beit ha Jail Road, namar ba ïa ka jaka kaba la pynshna ïa ki, ka long ka bym ïahap satia.
Ka la ong ruh, ba kiba shongdie jingdie ha katei ka jaka, kim shong satia naduh mynstep hynrei tang ha ka por janmiet bad ki briew kiba ïaid ba ïeng na katei ka jaka, kim don satia kano-kano ka jingwit ïa ki.
Nalor kata, ka la ong ruh ba na ka liang u Bah Sniawbhalang, u la pyntip sha ki ba un hap ban ïakren shuwa bad ki ophisar hashuwa ba un ai kano-kano ka jubab ïa ki.
“U Bah Sniawbhalang um pat ai kano-kano ka jubab, ngin hap ban shongbeit ban die jingdie ha katei ka jaka. Ki ophisar ka Municipal ruh kim dei ban wan leh donbor ïa ngi,” ka la ong.
Haba kylli ka la ong, ba katei ka jaka kadei kaba ïaid tang da ki briew bad kam shym la pynthud namar wat tang ka arshaka ruh kam lait ban ïaid. Ngi kwah ba ka Sorkar kan ai ha katei hi ka jaka bad ngin ïa shong tang janmiet ruh.
“Ka jaka ba shong ma ngi ki paidbah ruh ki ong kam long shngaiñ mynmiet, hynrei ka jingdon kiba die madan ha ka por mynmiet, ki paidbah ki sa long shngaiñ ban ïaid na katei ka jaka,” la ong ka Kong Clarissa.
