Jowai, Nailar 04
Ki pulit ka West Jaiñtia Hills District ki la lap ksai halor ka jingjia shah pynïap jong uwei u rangbah, 28 snem ka rta uba dei na Ialong (Luti Tuber), West Jaiñtia Hills da kaba ïoh ban kem noh ïa lai ngut ki briew na Assam.
Une u rangbah ba la shah pynïap u dei uba la tip kyrteng kum u (L) Damehi Mulieh ha kaba ïa ka met jong u la lap na Khliehriat, East Jaiñtia Hills District ha ka 31 tarik Naitung, 2026.
Kane ka jingjia ka la wan long hadien ba ki pulit ka Jowai ha ka 31 tarik Naitung ki la ïoh jingtip ba kawei ka Maruti Alto K10 kaba don ïa u registration number ML05-AG-0285 kaba ym tip ïa u trai ka la shah bat noh ha ki pulit ka Gumrah ha Cachar District ka Assam ha ryngkat arngut ki briew.
Hadien kane, ka kynhun ki pulit na Phramer Traffic Cell ka la hiar sha Gumrah ha ryngkat ka jingïatreilang bad ki pulit ka Assam bad kurup noh ïa kane ka kali bad rah noh ïa kine ki briew sha Meghalaya na ka bynta ban pynlong shuh shuh ïa ka jingtohkit.
Hadien, ki bahaïing ki la pyntip ba kane ka kali ka dei ka jong une u lanot ba la shah pynïap.
Kumta ki pulit ki la register case ha thanad Jowai hapoh ka kyndon jong ka Bharatiya Nyaya Sanhita (BNS).
Da kaba pynshong nongrim ha ka jingtohkit, ki pulit ki la kem noh ïa kine ki arngut ïa kiba la tip kyrteng kum u Dapjingkmen Paslein, 26 snem uba dei na ka shnong Lakasein bad u Samuel Lakai, 25 snem ka rta uba dei na shnong Umkyrpong, East Jaiñtia Hills.
Ïa uba lai, u Duniwankmen Sutnga, 26 snem la kem na ka shnong Khaidong, East Jaiñtia Hills ha ka step sngi Ba-ar.
Baroh kine ki lai ngut la ïalam tian bishar sha ka ïingbishar bad ka jingtohkit jong ki pulit ka dang ïaid shakhmat ban lap ïa ki jingshisha baroh halor kane ka jingjia bad ban lum shuh-shuh ïa ki sakhi satar.
Ki pulit ka West Jaiñtia Hills ki la ai ka jingkhublei ïa ka jingai jingïarap ba biang por jong ki pulit ka Gumrah, Assam lyngba ka jingïoh bat ka jong ki ïa kane ka kali bad ïa kine ki suba ka la ïarap shibun ban pynlong ïa ka jingtohkit kaba jop.
