Shillong, Nailar 04
Ka Meghalaya Schools Welfare Development Association (MSWDA) ka la ai khublei kyrpang ïa ka Sorkar Jylla kumjuh ïa ka tnad Pule puthi haba ïadei ba ka la pyllait paidbah ïa Ka Meghalaya School Performance Grading Index (MSPGI) 2025-26.
Haba kren halor kane u Bah H. M Marbañiang President ka MSWDA u la ïathuh ba ka jingthmu jong kane ka long ba ki skul kin tip hangno ki biang bad hangno ki duna, “Kum ka Association haba ngi la peit bniah ïa kane ngi ïohi ba ki don shibun ki jingduna ha ki skul, kaba pynlong ruh ïa ka pule puthi ha ka Jylla ban hiar sha trai duh ka PGI jong ka Ri baroh kawei” u la ong.
U Bah Marbaniang u la kdew ba ki don katto katne ki daw ba pynlong ïa ki skul ban hiar, kum ka jingbymbiang ha ki jingtei ïingskul, ki jingdonkam ha ka ban hikai ïa ki khynnah bad kane ka ktah bha ïa ki skul ïa kaba ka Association kan sa ïakren pat ha ka jingïalang ka ban sa long ha ka 08 tarik Nailar 2026 ha ka por 11:30 mynstep ha Khasi National Dorbar Hall, Mawkhar, Shillong.
U la pynkynmaw ba ha ki bnai kiba la dep, ka Association ka la dep pynlong jingïalang ha ki District jong ka Ri-lum Khasi-Jaiñtia bad ruh ha Tura. Kumta, kane ka jingïalang ka ban sa long mynta ka dei naduh ki skul Primary haduh Secondary bad Higher Secondary jong ka Ri-lum Khasi bad Jaiñtia ha kaba u la khot ïa baroh ki nongpynïaid skul bad ki nonghikai ba kin wan ban ïasnohkti lang ha katei ka sngi.
Shuh-shuh la pynkynmaw ïa ki jingdawa jong ki Secondary bad Higher Secondary Schools kiba khlem pat ïoh jingïarap Grant-in-Aid ïa kaba u Symbud Myntri Rangbah u Bah Prestone Tynsong u la khot ïa kren ha ka 04 tarik Jymmang 2026 ha kaba la ïadonlang u Commissioner & Secretary u Vijay Kumar Mantri, IAS.
Nalor kata u la pynkynmaw ruh ïa ka jingeh jong ki SSA Non-NOC Schools lane ki skul kiba khlem aiti sha ka Sorkar, kiba don haduh 1,544 tylli (LP bad UP), kaba pynbha pynkhlaiñ ïa ki skul, khamtam ïa ka Pre-Primary bad Lower Primary, ki jingeh jong ki nonghikai kiba la pyndep ïa ka D.El.Ed. lyngba ka NIOS ha ki snem kiba la dep.
